Беларускі аўтарынак у 2025 годзе вырас на 14%. Усяго ў краіне было прададзена і пастаўлена на ўлік 158,7 тыс. аўтамабіляў. Пра гэта на прэс-канферэнцыі ў Нацыянальным прэс-цэнтры паведаміў дырэктар УП «БАА-Кансалт» Дзмітрый Ярота. З гэтага года БАА пачала прадастаўляць даныя аб аўтарынку на падставе базы тэхпашпартоў транспартных сродкаў.
“Рынак вырас на 14%, прадэманстраваў упэўнены рост”, — сказаў ён.
На долю фізічных асоб прыйшлося 98,5 тыс. аўтамабіляў, 31,4 тыс. аўтамабіляў рэалізавалі юрыдычныя асобы, а 28,8 тыс. машын вырабіў і прадаў завод «БелДжы».
“Менавіта фізічныя асобы далі максімальны прырост да мінулага года — гэта амаль 19%. Юрыдычныя асобы засталіся на тым жа ўзроўні — там мінімальны прырост у 1%, а завод «БелДжы» паказаў значны прырост у 14%”, — дадаў ён.
У мінулым годзе было пастаўлена на ўлік 130,4 тыс. аўтамабіляў з рухавіком унутранага згарання (+3,6%), 8,5 тыс. паслядоўных гібрыдаў (+67%) і 19,8 тыс. чыстых электрамабіляў (+141%).
У мінулым годзе было пастаўлена на ўлік 74,8 тыс. новых аўтамабіляў, што на 31% больш, чым у 2024 годзе. Новымі БАА лічыць машыны, з моманту выпуску якіх прайшло 24 месяцы і менш. Дзмітрый Ярота падкрэсліў, што доля новых машын вырасла з 41% да 47%. Пры гэтым колькасць машын старэйшых за два гады вырасла з 82,2 да 83,9 тыс. аўтамабіляў.
“Мы бачым, што канал увозу праз фізічных асоб вельмі моцна пачынае нарошчваць свае аб’ёмы”, — сказаў ён.
У структуры імпарту аўтамабіляў юрыдычнымі асобамі на долю Кітая прыйшлося 62,8%, а доля Расіі склала 35,7%, Германіі — 1,3%. Пры гэтым у 2025 годзе адбылася пераарыентацыя імпарцёраў з Расіі на Кітай. У 2024 годзе доля РФ складала больш за 50%.
Фізічныя асобы ў асноўным таксама ўвозілі новыя аўтамабілі з Кітая — 64,4% ад агульнай колькасці. Таксама ўвозілі машыны з ЗША, Германіі. Але фізічныя асобы практычна не ўвозілі машыны з краін ЕАЭС.
Дзмітрый Ярота звярнуў увагу на тое, што ў мінулым годзе адбыліся змены ў структуры імпарту аўтамабіляў. Калі ў пачатку года больш за 80% аўтамабіляў увозілася юрыдычнымі асобамі, то ўжо ў канцы на долю фізічных асоб прыйшлося больш за 60% імпарту. Паводле ацэнак «БАА-Консалт», увосень 68% увезеных аўтамабіляў былі ўвезены фізічнымі асобамі для перапродажу.
