Прэзідэнт ЗША Дональд Трамп заявіў, што прасіў прэзідэнта Украіны Уладзіміра Зяленскага спыніць удары па расійскіх НПЗ. Прычына – рост цэн на дызельнае паліва.
“Праблема з Украінай і Расіяй заключаецца ў тым, што, ведаеце, адтуль паступае шмат дызельнага паліва, менавіта тут назіраецца рэзкі рост цэн. Паліва ідзе з Расіі, а расійскія заводы падвяргаюцца ўдарам з боку Украіны. Я прасіў прэзідэнта Зяленскага не наносіць удары па заводах, якія вырабляюць дызельнае паліва, па нафтаперапрацоўчых прадпрыемствах”, – сказаў Трамп.
“Рост цэн на дызельнае паліва выкліканы тым, што яго цяжка вывозіць з Расіі, і гэта шкодзіць усяму свету. Гэта трэба спыніць”, – дадаў ён.
Нагадаем, у ЗША ідзе перадвыбарная кампанія. У лістападзе павінны адбыцца прамежкавыя выбары ў Кангрэс. Высокія цэны на паліва з’яўляюцца адной з тэм дыскусіі.
Трамп таксама пацвердзіў, што дырэктар ЦРУ Джон Рэткліф уцягнуты ў працэс расійска-ўкраінскага ўрэгулявання. Пры гэтым, паводле слоў Трампа, яго спецпасланнікі Джарэд Кушнер і Стыў Уіткаф не адыходзяць убок.
