Беларусь і Кыргызстан правядуць форум рэгіёнаў. Ён адбудзецца восенню ў Мінску. Пра гэта заявіў у Бішкеку прэм’ер-міністр Беларусі Аляксандр Турчын.
«Важным элементам нашага двухбаковага ўзаемадзеяння застаецца міжрэгіянальнае супрацоўніцтва. Усталяваны і паспяхова рэалізуюцца прамыя кантакты паміж рэгіёнамі нашых краін. Лічым неабходным і далей пашыраць такую практыку, выкарыстоўваючы такія новыя фарматы ўзаемадзеяння, як правядзенне форумаў рэгіёнаў. У цяперашні час праводзіцца работа па падрыхтоўцы і змястоўным напаўненні першага Форуму рэгіёнаў Беларусі і Кыргызстана восенню гэтага года ў Мінску», — сказаў ён падчас перамоў са сваім кыргызскім калегам Адылбекам Касымаліевым.
Турчын таксама выказаў гатоўнасць актывізаваць удзел у сумесных праектах, дзяліцца тэхналогіямі, праводзіць стажыроўкі для спецыялістаў з Кыргызстана. Паводле яго слоў, створана сумесная камісія па прамысловасці, якая павінна вызначыць найбольш жыццяздольныя праекты. Адным з іх можа быць сумесная вытворчасць сілавых трансфарматараў.
Беларускі бок гатовы прыняць удзел у абнаўленні інфраструктуры Кыргызстана. Турчын разлічвае на выкарыстанне беларускай тэхнікі ў праектах па распрацоўцы карысных выкапняў. Мінск таксама гатовы прапанаваць выгадныя ўмовы экспартнага крэдытавання.
Яшчэ адно пытанне — арганізацыя прамога рэйса.
«Важным напрамкам застаецца ўзаемны гандаль харчовымі таварамі. Вітаем развіццё ў Бішкеку сеткі спецыялізаваных гандлёвых кропак, дзе рэалізуецца беларуская харчовая прадукцыя. Адначасова выступаем за нарошчванне паставак кыргызскай сельскагаспадарчай прадукцыі на беларускі рынак», — дадаў Аляксандр Турчын.
Паводле яго слоў, трэба прапрацаваць супрацоўніцтва ў вытворчасці насення цукровых буракоў. Кліматычныя ўмовы Кыргызстана дазваляюць атрымліваць яго, у адрозненне ад Беларусі.
