Міністр лясной гаспадаркі Беларусі Аляксандр Кулік сустрэўся з міністрам аховы навакольнага асяроддзя і сельскай гаспадаркі Грузіі Давідам Сонгулашвілі. Бакі дамовіліся аб абмене вопытам у сферы лясной гаспадаркі, паведамілі ў прэс-службе беларускага Мінлясгаса.
Грузінскі бок праявіў цікавасць да беларускага вопыту ў галіне гадавальнікавай гаспадаркі і штучнага лесааднаўлення. У Грузіі цяпер практыкуецца выключна натуральнае аднаўленне лясоў, аднак плануецца ўкараніць і штучнае. Таксама абмяркоўваліся магчымасці паляўнічага турызму.
“Беларусы ездзяць у Грузію, каб адпачыць на моры, а грузінаў мы запрашаем адпачыць у нашых цудоўных лясах, атрымаць асалоду ад іх прыгажосці”, — заявіў Кулік.
Сонгулашвілі запрасіў беларускіх лесаводаў у Грузію і паабяцаў у найбліжэйшы час накіраваць у Беларусь дэлегацыю лесаводаў, у тым ліку для ўдзелу ў мерапрыемствах з нагоды 90-годдзя органа кіравання лясной гаспадаркай.
