Сёння Віленскі акруговы суд павінен быў пачаць разгляд апеляцыі Антанаса Кандротаса, таксама вядомага па мянушцы Цэлафанас, і Андрэя Лобава. Раней яны былі асуджаныя за распальванне нянавісці і парушэнне грамадскага парадку. Аднак пасяджэнне не адбылося, паведамляе LRT.
Адвакат Кандротаса Эрыкас Ругенюс накіраваў у суд хадайніцтва аб пераносе пасяджэння. Ён аргументаваў просьбу сваёй хваробай, а таксама тым, што Кандротас, які знаходзіцца ў Беларусі, праходзіць лячэнне ў аддзяленні інтэнсіўнай тэрапіі. У яго, паводле інфармацыі адваката, здарыўся інфаркт.
Суд задаволіў хадайніцтва і перанёс пасяджэнне на 7 ліпеня.
Антанас Кандротас з’ехаў у Беларусь на пачатку мая. Ён ужо паспеў даць інтэрв’ю беларускаму тэлебачанню. Трэба адзначыць, што ў Літве ён знаходзіўся пад падпіскай аб нявыездзе.
Кандротасу прысудам суда быў прызначаны адзін год пазбаўлення волі, а Андрэю Лобаву — паўгода пазбаўлення волі з адтэрміноўкай выканання пакарання на паўтара года. Яны аспрэчваюць гэтае рашэнне.
