МУС уключыла ў «Пералік грамадзян Рэспублікі Беларусь, замежных грамадзян або асоб без грамадзянства, датычных да экстрэмісцкай дзейнасці», яшчэ 21 чалавека.
Сярод іншых у спіс трапіла сямейная пара з Драгічынскага раёна Дзмітрый і Вольга Капузы, асуджаныя на 24 і 21 год пазбаўлення волі адпаведна па абвінавачанні ў «акце тэрарызму» і «незаконных дзеяннях з боепрыпасамі».
36-гадовых Дзмітрыя і Вольгу затрымалі 16 студзеня 2024 года. Пасля затрымання на дзяржаўным тэлебачанні паказалі ролік «Зачыстка. Барацьба з дыверсантамі і агентамі спецслужбаў Украіны ў Беларусі», у якім прапагандысты заявілі, што пара нібыта працавала на ўкраінскія спецслужбы. Усяго тады было затрымана 12 чалавек. Сцвярджалася, што яны нібыта забіралі выбухоўку і рабілі тайнікі на тэрыторыі Беларусі. Падчас затрымання ў Дзмітрыя стралялі і паранілі ў сцягно.
Суд праходзіў у закрытым рэжыме. Акрамя тэрмінаў пазбаўлення волі Дзмітрый і Вольга атрымалі буйныя штрафы. Летам 2025 года іх унеслі ў «спіс тэрарыстаў».
Цяпер у спісе 6526 прозвішчаў.
Беларускія ўлады рэгулярна выкарыстоўваюць абвінавачанні ў экстрэмізме для барацьбы з палітычнымі апанентамі і іншадумствам у цэлым.
