У Гродне затрымалі пенсіянера, які здзейсніў серыю крадзяжоў ровараў, паведамляе УУС Гродзенскага аблвыканкама.
У пачатку снежня ў аператыўна-дзяжурную службу Кастрычніцкага РУУС звярнулася 31-гадовая жыхарка абласнога цэнтра і паведаміла пра знікненне свайго ровара. Супрацоўнікі крымінальнага вышуку раённага ўпраўлення ўстанавілі абставіны інцыдэнту і асобу, датычную да «ўгону». Ім аказаўся 63-гадовы мясцовы жыхар.
Высветлілася, што ў пачатку снежня каля пад’езда аднаго з дамоў па вуліцы Вольгі Саломавай пенсіянер заўважыў ровар. Ён падышоў да яго бліжэй і, убачыўшы, што той не прысцёбнуты, пакаціў ровар у свой гараж. Яго дзеянні трапілі на камеры відэаназірання.
Падчас разбору высветлілася, што гэта не адзіны такі выпадак. У шэрагу выпадкаў мужчына пераразаў велазамкі. У цяперашні час устанаўліваюцца ўсе пацярпелыя. Выкрадзенае канфіскавалі і ў далейшым маюць намер вярнуць уладальнікам.
У дачыненні да гродзенца ўзбуджана крымінальная справа за крадзеж.