У сталіцы Венесуэлы у ноч на суботу прагрымела серыя выбухаў, у выніку якіх частка раёнаў Каракаса засталася без электразабеспячэння. Прычыны таго, што адбылося, пакуль не ўстаноўлены.
Як паведамляе CNN, першы выбух быў зафіксаваны каля 1:50 па мясцовым часе. Са слоў карэспандэнткі Асмары Эрнандэс, адзін з выбухаў быў настолькі магутным, што ў яе доме дрыжалі вокны. Пасля гэтага ў некалькіх раёнах горада знікла электрычнасць, а відавочцы чулі гукі пралёту самалётаў.
У распараджэнні CNN апынулася відэа, на якім відаць, як над начным горадам падымаюцца два слупы дыму, ля падножжа аднаго з іх прыкметнае аранжавае ззянне. Затым у іншай частцы горада фіксуецца ўспышка, якая суправаджаецца глухім гулам.
Венесуэльскія СМІ Efecto Cocuyo і Tal Cual Digital паведамілі, што гукі выбухаў былі чутныя не толькі ў Каракасе, але і ў штаце Ла-Гуайра на поўнач ад сталіцы, а таксама на ўзбярэжжы краіны, у тым ліку ў горадзе Ігеротэ ў штаце Міранда.
#Ahora Llegan imágenes de aviones y helicopteros sobrevolando zonas de la ciudad de Caracas, qué desde la 1:59 am de este 3 de enero se han registrado distintas detonacione y explosiones, al igual que en zonas de Vargas 2:57 am pic.twitter.com/hssnt6bfXc
— Efecto Cocuyo (@EfectoCocuyo) January 3, 2026
Паводле даных Reuters, у паўднёвай частцы Каракаса, недалёка ад буйной вайсковай базы, таксама было зафіксавана адключэнне электраэнергіі. Відавочцы паведамлялі пра пралёты самалётаў, гучныя гукі і як мінімум адзін слуп дыму.
Інцыдэнты былі зафіксаваныя на фоне жорсткіх заяў прэзідэнта ЗША Дональда Трампа, які раней неаднаразова папярэджваў пра гатоўнасць Вашынгтона да новых дзеянняў супраць меркаваных наркагандлёвых сетак у Венесуэле і не выключаў пачатку наземных аперацый. У кастрычніку ён заявіў, што санкцыянаваў дзейнасць ЦРУ на тэрыторыі краіны для барацьбы з незаконным абаротам наркотыкаў і нелегальнай міграцыяй.
ЗША ў апошнія месяцы ўзмацнілі ціск на ўлады Венесуэлы, у тым ліку праз пашырэнне санкцый і нарошчванне вайсковай прысутнасці ў рэгіёне, дамагаючыся сыходу прэзідэнта Нікаласа Мадуры. Пентагон на момант публікацыі не прадставіў каментарыяў адносна таго, што адбываецца ў Каракасе.
#AHORA 2:40 AM 3 de enero 2026.
Video de explosiones hacia la zona de Fuerte Tiuna. Habitantes de Caracas reportan sonido de aviones sobre la capital venezolana. pic.twitter.com/5rKd4m7Wwi— TalCual (@DiarioTalCual) January 3, 2026
