Міністр замежных спраў Беларусі Максім Рыжанкоў не будзе прысутнічаць на першым пасяджэнні Савета міру ў Вашынгтоне, паведамляе «Радыё Свабода» са спасылкай на афіцыйныя амерыканскія крыніцы.
Паводле інфармацыі выдання, на сустрэчы 19 лютага ўвогуле не будзе прадстаўнікоў Беларусі.
11 лютага Аляксандр Лукашэнка заявіў, што не паедзе на Савет міру ў ЗША, бо атрымаў запрашэнне позна, калі яго графік ужо быў сфарміраваны. Сёння ён сустракаўся са старшынёй Сената Зімбабвэ Мэйбл Мемары Чынамонай. Яшчэ адной прычынай не ехаць у ЗША Лукашэнка назваў лагістычныя складанасці з-за санкцый ЕС.
Пазней Лукашэнка абверг здагадкі, што ляцець на Савет міру яму нібыта забараніў Уладзімір Пуцін. Ён дадаў, што Беларусь не збіраецца выдзяляць мільярды Газе, і заявіў, што хоча пабываць на іншых пасяджэннях савета «не ў Вашынгтоне, дзесьці ў Еўропе або на Блізкім Усходзе, можа быць, у Ізраілі, бліжэй тут у Турцыі», калі будзе абмяркоўвацца пытанне Украіны.
Прэс-сакратар Лукашэнкі Наталля Эйсмант заявіла, што Беларусь у Вашынгтоне будзе прадстаўляць кіраўнік МЗС Рыжанкоў.
МЗС Беларусі пакуль не давала афіцыйных каментароў.
