Прэс-служба МЗС Арменіі апублікавала ў сетцы X допіс з нагоды Дня Незалежнасці Беларусі (Дня Рэспублікі), які адзначаецца 3 ліпеня. У паведамленні віншаванне адрасавана дружалюбнаму народу Беларусі, але дэманстратыўна не згадваецца Аляксандр Лукашэнка.
«У сувязі з Днём Незалежнасці Арменія перадае свае цёплыя віншаванні і найлепшыя пажаданні дружалюбнаму народу Беларусі», — гаворыцца ў паведамленні.
On the occasion of #IndependenceDay, #Armenia conveys its warm congratulations & best wishes to the friendly people of #Belarus.
— MFA of Armenia🇦🇲 (@MFAofArmenia) July 3, 2026
Справа ў тым, што ўлады ў Мінску ў аналагічных віншаваннях ужо некалькі гадоў ігнаруюць кіраўніцтва Арменіі. Такая практыка існуе і ў дачыненні да іншых краін, якія Лукашэнка лічыць недружалюбнымі.
Канфлікт паміж рэжымам у Мінску і кіраўніцтвам Арменіі выйшаў у публічную плоскасць у 2024 годзе, хоць перадумовы назапашваліся праз асаблівыя адносіны Лукашэнкі і Аліева. У чэрвені 2024 года Нікол Пашынян публічна заявіў, што не прыедзе ў Беларусь, пакуль Лукашэнка застаецца яе кіраўніком.
Варта адзначыць, што так званы Дзень Незалежнасці 3 ліпеня — гэта дзень вызвалення Чырвонай арміяй горада Мінска ад германскай акупацыі (3 ліпеня 1944 года). Мінскі рэжым адмовіўся ад святкавання Дня Незалежнасці 27 ліпеня, у дзень прыняцця Дэкларацыі аб дзяржаўным суверэнітэце Беларускай ССР ад 27 ліпеня 1990 года. Пасля жнівеньскага путчу 1991 года ў Савецкім Саюзе, 25 жніўня 1991 года Вярхоўны Савет Беларускай ССР надаў Дэкларацыі аб суверэнітэце рэспублікі статус канстытуцыйнага закона.
