У МУС Беларусі заявілі пра прыняцце дадатковых мер бяспекі ў сувязі са святкаваннем Дня Незалежнасці. Паводле звестак ведамства, міністр унутраных спраў Іван Кубракоў распарадзіўся перавесці асабовы склад органаў унутраных спраў і ўнутраных войскаў на ўзмоцнены рэжым нясення службы.
Месцы правядзення масавых мерапрыемстваў будуць кантралявацца з дапамогай рэспубліканскай сістэмы маніторынгу грамадскай бяспекі, а дадатковыя меры закрануць аб’екты транспарту і іншыя месцы масавага знаходжання людзей.
На ўваходзе ў святочныя лакацыі будуць працаваць кантрольна-прапускныя пункты з асабістым надглядам наведвальнікаў і іх рэчаў. Для пажылых людзей, людзей з інваліднасцю і сем’яў з дзецьмі арганізуюць асобныя пункты пропуску. У ахоўны перыметр не будуць дапускаць людзей з жывёламі, забароненымі прадметамі, а таксама на веласіпедах і сродках персанальнай мабільнасці.
МУС таксама папярэдзіла пра магчымыя абмежаванні руху і змены маршрутаў грамадскага транспарту і рэкамендавала загадзя планаваць паездкі.
Ведамства заклікала паведамляць пра безгаспадарныя прадметы або падазроных асоб.
