Латвійскія памежнікі са стральбой затрымалі мігрантаў, якія нелегальна перайшлі беларуска-латвійскую мяжу, і іх кур’ераў, паведамляе памежная служба Латвіі.
У чацвер, 2 ліпеня, памежнікі пасля пагоні спынілі аўтамабіль Dodge у Лаўцэскай воласці. З машыны выскачылі кіроўца і пасажыры і паспрабавалі схавацца. Памежнікі на англійскай і латышскай мовах запатрабавалі спыніцца і папярэдзілі пра прымяненне зброі. Тыя, хто ўцякаў, не адрэагавалі. Тады памежнікі зрабілі папераджальны стрэл у паветра.
Пасля гэтага чацвёра пасажыраў былі затрыманыя. Устаноўлена, што яны нелегальна перасеклі беларуска-латвійскую мяжу і не мелі дакументаў, якія даюць права знаходзіцца ў Латвіі. Неўзабаве пасля гэтага быў затрыманы і кіроўца — грамадзянін Малдовы.
Яшчэ адно затрыманне адбылося ў Даўгаўпілсе. Пасля спынення аўтамабіля Chrysler кіроўца паспрабаваў уцячы. Яго затрымалі пасля папераджальных стрэлаў у паветра. У машыне выявілі шэсць чалавек, якія нядаўна незаконна перасеклі беларуска-латвійскую мяжу.
Трэцяга грамадзяніна Малдовы, гэтым разам без стральбы, затрымалі ў Калкунскай воласці.
Дзесяць мігрантаў вярнулі на беларускую мяжу. У дачыненні да грамадзян Малдовы распачаты адміністрацыйныя працэсы. Устаноўлена, што яны знаходзіліся ў Латвіі без абавязковага запаўнення і падачы анкеты па прадухіленні дзяржаўнай пагрозы.
