Дэкан факультэта Беларускай сельскагаспадарчай акадэміі ў Горках і індывідуальны прадпрымальнік прыдумалі, як зарабляць грошы на залічэнні замежных студэнтаў. У выніку абодвух судзілі за крадзеж шляхам злоўжывання службовымі паўнамоцтвамі групай асоб у асабліва буйным памеры.
Абвінавачаныя арганізавалі схему па пошуку індывідуальных прадпрымальнікаў, якія запрашалі замежных студэнтаў для навучання ў ВНУ. За залічэнне 305 студэнтаў індывідуальным прадпрымальнікам належала ўзнагароджанне. Аднак фактычную працу па пошуку студэнтаў выконвалі супрацоўнікі факультэта па ўказанні дэкана, а грошы, якія прызначаліся ІП, дзяліліся паміж абвінавачанымі, паведамляе пракуратура Магілёўскай вобласці.
З чэрвеня 2022 года па верасень 2025 года абвінавачаныя атрымалі больш за 320 тысяч рублёў.
На судзе абодва абвінавачаныя прызналі віну і кампенсавалі шкоду ВНУ.
Суд Горацкага раёна прысудзіў 43-гадовага дэкана да 6 гадоў калоніі і штрафу ў памеры 500 базавых велічынь (22,5 тысячы рублёў). Яго 42-гадовы саўдзельнік атрымаў 5 гадоў калоніі з адтэрміноўкай на тры гады і штраф у 300 базавых велічынь (13,5 тысячы рублёў). Абодва пазбаўлены права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, на тэрмін 5 гадоў.
Прысуд не ўступіў у законную сілу і можа быць абскарджаны.
