Святлана Ціханоўская сустрэлася з прэзідэнтам Польшчы Каралем Наўроцкім. Як паведамілі ў Офісе Ціханоўскай, гэта першая двухбаковая сустрэча пасля абрання Наўроцкага прэзідэнтам. Раней лідары сустракаліся на палях Генасамблеі ААН.
Святлана Ціханоўская выказала падзяку за падтрымку беларусаў, паслядоўную і прынцыповую пазіцыю, а таксама за падтрымку вызваленых палітычных зняволеных, рэпрэсаваных і дэмакратычнага руху. Падчас сустрэчы абмяркоўваўся працэс вызвалення палітвязняў, сітуацыя з Анджэем Пачобутам, адносіны з адміністрацыяй ЗША, а таксама сітуацыя з бяспекай у рэгіёне. Святлана Ціханоўская выказала надзею, што палітвязні будуць і надалей выходзіць на волю, а Польшча, як і раней, акажа неабходную падтрымку вызваленым, у тым ліку ў пытаннях легалізацыі і афармлення дакументаў.
Святлана Ціханоўская таксама прапанавала Каралю Наўроцкаму некалькі сумесных ініцыятыў у падтрымку беларускай супольнасці ў Польшчы ў галіне гістарычнай спадчыны, культуры і літаратуры, запрасіла прыняць удзел у беларускіх фестывалях і аматарскіх спартыўных спаборніцтвах, арганізаваных беларусамі, а таксама ўключыць Беларусь у мерапрыемствы рэгіянальнага фармату, такія як «Люблінскі трохкутнік».
Наўроцкаму таксама быў перададзены праект «канцэпцыі Беларускага інстытута нацыянальнай памяці, распрацаванай дэмакратычнымі сіламі, якая дапаможа людзям даведацца праўду пра рэпрэсіі савецкай эпохі і апошніх гадоў праз доступ да архіваў і сведчанняў, а таксама дапаможа дзяржаве ачысціць сваю бюракратычную сістэму ад заганных практык мінулага». Варта адзначыць, што да абрання прэзідэнтам Польшчы Караль Наўроцкі ўзначальваў аналагічную польскую структуру — Інстытут нацыянальнай памяці.
