Больш за 1300 затрыманых у Беларусі літоўскіх грузавікоў вярнуліся дадому. Пра гэта ў эфіры “Першага інфармацыйнага” заявіў старшыня Дзяржаўнага мытнага камітэта Беларусі Уладзімір Арлоўскі. Паводле яго слоў, паслугі па захоўванні аплачаны амаль за 1400 транспартных сродкаў.
“Фактычна праз беларуска-літоўскі і беларуска-польскі ўчасткі мяжы выбыла 1300 грузавікоў, яшчэ 100 чакаюць уезду ў Літву. На нашай тэрыторыі яшчэ засталося крыху больш за 500”, – расказаў ён.
Кіраўнік ГТК сцвярджае, што вяртанне грузавікоў адбываецца павольна па віне літоўскага боку.
“Напрыклад, прапускная здольнасць літоўскага пункта пропуску «Мядзінінкай» (сумежнага з беларускім «Каменным Логам») дазваляе прымаць з Беларусі да 500 транспартных сродкаў у суткі. Аднак у апошнія гады і цяпер у сярэднім праходзіць толькі 70-80 грузавікоў, зрэдку — да 140. У выніку чэргі на мяжы захоўваюцца дагэтуль, у тым ліку сярод машын, раней размешчаных на спецстаянках у Беларусі”, – заявіў ён.
Нагадаем, Беларусь з восені 2025 года ўтрымлівала грузавікі з літоўскай рэгістрацыяй у адказ на закрыццё мяжы Літвой. Беларускія ўлады змясцілі аўтамабілі на спецыяльныя платныя стаянкі і не выпускалі іх некалькі месяцаў. Беларусь дазволіла выезд грузавікоў з 23 сакавіка, пасля перамоваў Аляксандра Лукашэнкі і спецпасланніка прэзідэнта ЗША Джона Коўла. Перавозчыкам дазваляецца забраць грузавікі пасля ўнясення платы за стаянку.
