Першы намеснік прэм’ер-міністра Мікалай Снапкоў сёння сустрэўся з намеснікам губернатара кітайскай правінцыі Ганьсу Ван Бінам. Вітаючы госця, першы віцэ-прэм’ер адзначыў дапамогу рэгіёна падчас пандэміі. Асноўная мэта візіту — падрыхтоўка міжрэгіянальнага форуму.
“Правінцыя Ганьсу і народ правінцыі Ганьсу займае асаблівае месца ў беларуска-кітайскіх адносінах. Цяпер ужо мала хто гэта ўспамінае, але мы гэта памятаем і будзем памятаць заўсёды. Падчас пандэміі COVID-19 Ганьсу першай з правінцый Кітайскай Народнай Рэспублікі аказала Беларусі медыцынскія сродкі для супрацьдзеяння вірусу і лекі традыцыйнай кітайскай медыцыны для лячэння і прафілактыкі вірусу. І я ні кроплі не хітрую, калі кажу, што сапраўды гэтыя прэпараты выратавалі многім жыцці ў Беларусі”, — сказаў Снапкоў.
Ён адзначыў, што разглядае візіт кітайскага чыноўніка як працяг сяброўства і ўзаемнай падтрымкі. Ён выказаў надзею на “якасна новы прарыў ва ўзаемаадносінах і выхад на якасна новы ўзровень супрацоўніцтва правінцыі Ганьсу з Гродзенскай вобласцю”.
Снапкоў не ўпусціў магчымасці спаслацца на сяброўства Лукашэнкі і Сі Цзіньпіна. Паводле яго слоў, яно з’яўляецца “магутным фундаментам” для супрацоўніцтва, а эканамічныя адносіны павінны падняцца на ўзровень палітычных і чалавечых.
Першы віцэ-прэм’ер дадаў, што нядаўна была падпісана дырэктыва “Аб практычным напаўненні ўсепагоднага і ўсебаковага стратэгічнага партнёрства Рэспублікі Беларусь з Кітайскай Народнай Рэспублікай”.
“Гэта дакумент унутраны. Гэта з’яўляецца настольнай кнігай для нашых кіраўнікоў па дасягненні намечаных мэт супрацоўніцтва з Кітайскай Народнай Рэспублікай у інвестыцыйным кірунку і ў гандлёва-эканамічным. Гэта план работы. Як фінансіст, я думаю, вы ведаеце, што самае галоўнае — гэта правільны фінансавы план. І механізмы рэалізацыі нашых прагнозаў, нашых планаў развіцця шмат у чым падобныя з Кітайскай Народнай Рэспублікай.
Менавіта сістэмай планавання мы адрозніваемся, нашы эканамічныя сферы адрозніваюцца ад іншых краін, па вялікім рахунку, усяго астатняга свету. Мала дзе засталіся планы развіцця. Як сказаў таварыш Сі Цзіньпін на Азіяцкім форуме ў 2022 годзе, кіраваная дзяржава заўсёды багатая, а дзяржава ў хаосе заўсёды бедная. Таму асаблівае месца ў прынятай дырэктыве Прэзідэнта Рэспублікі Беларусь аб развіцці адносін Беларусі і Кітая займае міжрэгіянальнае супрацоўніцтва. У гэтай пяцігодцы мы ўкараняем прынцып прыкладнога супрацоўніцтва — правядзенне прыкладных міжрэгіянальных форумаў. І міжрэгіянальны форум Ганьсу — Гродзенская вобласць будзе першым, і я вельмі спадзяюся, што ўзорным”, — расказаў Снапкоў.
Ён дадаў, што з моцным Кітаем будзе моцная Беларусь, таму міжрэгіянальныя форумы будуць прадметна адпрацоўвацца і праводзіцца.
“Кожны год мы будзем праводзіць адзін або два форумы. І іх мэта, скажу шчыра, — гэта падпісанне канкрэтных інвестыцыйных кантрактаў для прыходу, актыўнага прыходу, кітайскіх прадпрыемстваў у Рэспубліку Беларусь для рэалізацыі прамысловых праектаў развіцця. Гэта мая асноўная задача, і гэта асноўнае заданне, якое пастаўлена перада мной прэзідэнтам нашай краіны.
Наш беларуска-кітайскі рэгіянальны форум, які адбудзецца ў горадзе Ланьчжоу ў правінцыі Ганьсу, я вельмі спадзяюся, што мы з вамі зможам сапраўды падпісаць рэальныя кантракты, рэальныя інвестыцыйныя праекты для больш актыўнага, маштабнага прыходу прадпрыемстваў правінцыі Ганьсу ў Гродзенскую вобласць”, — заключыў ён.
