Суд у Оршы асудзіў 39-гадовага жыхара горада за наўмыснае прывядзенне ў непрыдатнасць чыгуначных пуцей. Мужчыну прызначана пакаранне ў выглядзе абмежавання волі з накіраваннем у папраўчую ўстанову адкрытага тыпу на тэрмін 2 гады 7 месяцаў. Прысуд яшчэ не ўступіў у законную сілу, ён можа быць абскарджаны і апратэставаны.
У пракуратуры Віцебскай вобласці расказалі падрабязнасці справы. Мужчына на працягу года працаваў слесарам у лакаматыўным дэпо Орша імя К. С. Заслонава.
“У адзін з дзён жніўня 2025 года нецвярозы мужчына рухаўся ўздоўж чыгуначнага палатна. У працэсе руху ён перавёў тры нецэнтралізаваныя ручныя стрэлачныя пераводы ў нейтральнае становішча, што безумоўна забяспечвала сход рухомага складу чыгуначнага транспарту. У выніку пры праходжанні па дадзеным участку саставу адбыўся сход колавых пар цеплавоза і першага вагона”, — гаворыцца ў паведамленні пракуратуры.
У выніку сходу лакаматыва з рэек пацярпелі вузлы і механізмы рухомага складу, а таксама чыгуначнае палатно і стрэлачныя пераводы. Шкода ацэненая ў суму больш за 18 тыс. рублёў.
“Матывам сваіх дзеянняў фігурант назваў жаданне праверыць, як лакаматыўная брыгада адрэагуе на аварыйную сітуацыю”, — дадалі ў пракуратуры.
Паведамляецца, што, акрамя асноўнага пакарання, суд таксама ўжыў да мужчыны прымусовыя меры бяспекі і лячэння ад хранічнага алкагалізму.