ЗША і Іран вярнуліся да актыўнага абмену ўдарамі. У сераду прэзідэнт ЗША Дональд Трамп заявіў, што мемарандум аб спыненні агню не дзейнічае. Эскалацыя пачалася з таго, што ў панядзелак іранскія сілы атакавалі судны ў Армузскім праліве. У адказ на гэта Цэнтральнае камандаванне ЗША нанесла ўдары па 80 цэлях у Іране. Іранскія вайскоўцы, у сваю чаргу, атакавалі амерыканскія аб’екты ў Кувейце і Бахрэйне.
Сёння ўначы Цэнтральнае камандаванне ЗША правяло новую атаку супраць Ірана. Удары былі нанесены «прыкладна па 90 іранскіх ваенных цэлях, уключаючы сістэмы СПА, сродкі берагавой разведкі, склады ракет і беспілотнікаў, ваенна-марскія аб’екты і ваенную лагістычную інфраструктуру ўздоўж іранскага ўзбярэжжа».
«Гэтыя ўдары адбыліся пасля паспяховага правядзення наступальных аперацый у Іране напярэдадні ўвечары», — пракаментавалі ў камандаванні.
У адказ на гэта Корпус вартавых ісламскай рэвалюцыі нанёс новыя ўдары па амерыканскіх аб’ектах у Кувейце і Бахрэйне.
«Корпус вартавых ісламскай рэвалюцыі папярэджвае амерыканскую армію, якая здзяйсняе забойствы дзяцей, што ў выпадку паўтарэння агрэсіі нашы знішчальныя меры ў адказ будуць распаўсюджаны і на іншыя амерыканскія базы ў рэгіёне», — гаворыцца ў заяве КВІР.
Іранскія дзяржаўныя СМІ таксама распаўсюдзілі заяву крыніцы ў службах бяспекі, з якой вынікае, што ў адказ на амерыканскія ўдары будзе закрывацца Армузскі праліў, а па амерыканскіх цэлях будуць наносіцца ўдары ў адказ у суадносінах два да аднаго.
На фоне абвастрэння сітуацыі вакол Ірана нафтавыя каціроўкі ўчора ўвечары ўздымаліся вышэй за 80 долараў за барэль. Сёння раніцай бліжэйшы ф’ючарс на нафту маркі Brent гандлюецца ў раёне 79 долараў за барэль.
