Прэзідэнт Украіны Уладзімір Зяленскі заявіў, што даручыў сваёй камандзе арганізаваць сустрэчу з прэзідэнтам РФ Уладзімірам Пуціным у Жэневе. Пра гэта ён паведаміў у інтэрв’ю Axios.
Як піша выданне, Зяленскі падкрэсліў, што найлепшы спосаб дамагчыся прарыву ў тэрытарыяльных пытаннях — гэта асабістая сустрэча з Пуціным, і ён даручыў сваёй камандзе арганізаваць будучую сустрэчу на ўзроўні лідараў у Жэневе.
У публікацыі таксама гаворыцца, што амерыканскія перамоўшчыкі прапанавалі вывесці ўкраінскія войскі з тэрыторыі Данбаса, якая павінна стаць дэмілітарызаванай «свабоднай эканамічнай зонай». Вашынгтон пакуль не вызначыўся, якая краіна будзе валодаць суверэнітэтам над гэтай тэрыторыяй. Зяленскі гатовы абмеркаваць вывад войскаў, калі Масква адвядзе свае сілы на такую ж адлегласць. Пры гэтым ён адхіліў прэтэнзіі Расіі на суверэнітэт над гэтай тэрыторыяй. Паводле яго слоў, у другім раундзе перамоваў расійскія афіцыйныя асобы паабяцалі пракансультавацца з Масквой і вярнуцца з падрабязнай пазіцыяй па тэрытарыяльным пытанні.
Зяленскі таксама заявіў, што ўкраінцы не зразумеюць аднабаковага вываду войскаў з Данбаса.
«Эмацыйна людзі ніколі гэтага не даруюць. Ніколі. Яны не даруюць… мне, яны не даруюць [ЗША]», – цытуе яго выданне.
Разам з тым, калі дамоўленасці будуць прадугледжваць простую замарозку па лініі фронту ў Данбасе, як у двух іншых рэгіёнах, то народ яе прыме.
«Я думаю, што калі мы ўключым у дакумент пункт пра тое, што будзем прытрымлівацца існуючай лініі судакранання, то, я думаю, людзі падтрымаюць гэта на рэферэндуме. Такое маё меркаванне», – сказаў ён.
З’яўленне ў Жэневе Уладзіміра Мядзінскага Зяленскі ацэньвае як прыкмету таго, што расійская дэлегацыя паспрабуе зацягнуць перамовы, каб выйграць час для Расіі на полі бою. Паводле яго слоў, Мядзінскі, як і Пуцін, схільны разважаць пра гістарычныя прычыны канфлікту.
«У нас няма часу на ўсю гэтую лухту. Нам трэба прыняць рашэнне і скончыць вайну», – сказаў прэзідэнт Украіны.
Выданне піша са спасылкай на крыніцы, што ў аўторак перамовы ў Жэневе ў палітычнай групе зайшлі ў тупік з-за пазіцыі Мядзінскага, у той час як ваенная група працягнула прасоўвацца.
Зяленскі таксама дапусціў, што выбары, магчыма, давядзецца праводзіць падчас крохкага перамір’я, і што ў такім выпадку ён можа стаць кандыдатам. Паводле яго слоў, Расія пакуль згодная толькі на аднадзённае спыненне агню, неабходнае Украіне для арганізацыі і правядзення агульнанацыянальных выбараў, а не на 60 дзён. Ён лічыць пазіцыю Расіі абсурднай і магчымым сведчаннем таго, што Масква не гатовая да сапраўднага міру.
