У Расіі зноў скардзяцца на рост паставак малочнай прадукцыі з Беларусі. На гэты раз матэрыял пра сітуацыю на рынку малака апублікавалі «Известия».
Выданне адзначае, што па выніках 2025 года вытворцы малака-сырца не змаглі рэалізаваць 73,5 тыс. т прадукцыі, што з’яўляецца самым высокім паказчыкам за апошні час. У цэлым вытворчасць малака ў мінулым годзе ў РФ вырасла на 0,2 млн т да 34,3 млн т. У публікацыі гаворыцца, што праблемы расійскіх вытворцаў звязаныя з ростам паставак з Беларусі, а таксама павелічэннем попыту на беларускія тавары з боку расійскіх спажыўцоў.
Апытаныя выданнем эксперты адзначаюць узрослы ўплыў на расійскі малочны рынак паставак з Беларусі. Таксама прадстаўнік «Молвеста» Анатоль Лосеў паведаміў, што ў РФ цяпер паступаюць запасы беларускага масла і сыру, якія не ўдалося прадаць у мінулым годзе. Пры гэтым кампаніі прадаюць тавары танней «з-за асаблівасцей малочнага дзяржрэгулявання ў суседняй рэспубліцы і блізкіх да крытычных тэрмінаў рэалізацыі».
Выданне звяртае ўвагу на рост долі брэнда «Брэст-Літоўск» ад вытворцы «Савушкін прадукт» у продажах сыру і сметанковага масла ў мінулым годзе.
Трэба адзначыць, што нядаўна падобны матэрыял з’явіўся ў «Коммерсанте». Тады выданне паведамляла, што цэны на масла былі адной з асноўных тэм беларуска-расійскіх перамоваў па АПК на ўзроўні віцэ-прэм’ераў Юрыя Шулейкі і Дзмітрыя Патрушава. У публікацыі таксама гаварылася, што расійскія вытворцы сутыкнуліся з ростам сабекошту масла, што адбілася на цэнах і прывяло да зніжэння продажаў. У той жа час беларускія вытворцы павялічылі сваю долю. Яна дасягнула 23%. У выніку расійскія кампаніі не могуць прадаць запасы.
Матэрыял тады з’явіўся напярэдадні з’езда аб’яднання расійскіх малочнікаў «Саюзмалако». Міністр сельскай гаспадаркі і харчавання Юрый Горлаў, выступаючы на мерапрыемстве, тады адкінуў абвінавачанні ў магчымым дэмпінгу. Ён запэўніў, што ў Беларусі ў 2025 годзе рэнтабельнасць вытворчасці малака ў сярэднім па краіне склала 26%, а рэнтабельнасць перапрацоўкі — 11%. Міністр таксама адзначыў, што Беларусь гатовая перайсці на свабоднае цэнаўтварэнне на малако-сырэц.
Віцэ-прэм’ер урада РФ Дзмітрый Патрушаў на з’ездзе запэўніў, што ўзгодненыя паміж дзвюма краінамі балансы паставак вытрымліваюцца. Разам з тым ён дапусціў стварэнне рабочай групы, у якой быў бы больш шырока прадстаўлены расійскі бізнес, і такая група магла б падключыцца да выпрацоўкі аб’ёмаў паставак.