Беларусь фарміруе яшчэ адно дэсантнае злучэнне, а таксама нарошчвае беспілотныя сілы. Пра гэта заявіў начальнік Дэпартамента міжнароднага ваеннага супрацоўніцтва – памочнік міністра абароны генерал-маёр Валерый Рэвенка на штогадовым брыфінгу для акрэдытаваных ваенных аташэ замежных дзяржаў.
Паводле яго слоў, план развіцця беларускіх Узброеных сіл на 2021-2025 гады прадугледжваў прыярытэтнае развіццё сістэм кіравання, разведкі, радыёэлектроннай барацьбы, супрацьпаветранай абароны, воінскіх часцей і падраздзяленняў ракетных войскаў і артылерыі.
“Ва Узброеных сілах адбылося павелічэнне колькасці баявога кампанента, павысілася гатоўнасць і здольнасць выконваць задачы па прызначэнні складам мірнага часу ў любых умовах абстаноўкі.
У сілах спецыяльных аперацый Узброеных сіл пачата фарміраванне яшчэ аднаго дэсантнага злучэння.
Працягваецца інтэнсіўнае нарошчванне беспілотнай авіяцыі Узброеных сіл, развіццё яе разведвальнага і ўдарнага кампанентаў.
Павялічана колькасць падраздзяленняў беспілотнай авіяцыі не толькі ў воінскіх часцях спецыяльнага прызначэння, але і ў кожнай механізаванай і дэсантнай брыгадзе, дзе сфарміраваны падраздзяленні ўдарных беспілотных авіяцыйных комплексаў”, – сказаў ён, перадае прэс-служба Мінабароны.
Паводле яго слоў, за мінулы навучальны год у войскі пастаўлены больш за 75 тыс. адзінак розных узбраенняў, ваеннай і спецыяльнай тэхнікі, ваенна-тэхнічнай маёмасці, у тым ліку самалёты Су-30СМ2, верталёты Мі-35М, ЗРК «Тор-М2″, радыёлакацыйныя комплексы і інш.
Падчас брыфінгу не абышлося без палітінфармацыі ад Рэвенкі. Ён падкрэсліў гатоўнасць беларускага боку да дыялогу па ваеннай лініі. Адначасова памочнік міністра абароны канстатаваў знішчэнне сістэмы міжнароднай бяспекі, адзначыў жорсткую канкурэнцыю асобных дзяржаў і іх саюзнікаў. На яго думку, яны змагаюцца не столькі за тэрыторыі, колькі за магчымасць кіравання энергетычнымі, фінансавымі і лагістычнымі патокамі, за кантроль над перадавымі тэхналогіямі і над свядомасцю цэлых народаў.
Рэвенка заявіў, што Еўрапейскі рэгіён ператварыўся ў адзін з асноўных тэатраў стратэгічнага саперніцтва. Еўропа страціла статус тэрыторыі з нізкай верагоднасцю маштабнай вайны.
“Вынікі і ўрокі Другой сусветнай вайны, на жаль, аказаліся хутка забытымі. Паралельна ідуць наступныя працэсы: ваенна-палітычная палярызацыя Еўропы; татальная мілітарызацыя; разбурэнне механізмаў стратэгічнай стабільнасці і кантролю над узбраеннямі”, – сказаў ён.
Рэвенка заявіў, што Еўропа ўступіла ў фазу стварэння эканомікі ваеннага часу: растуць ваенныя бюджэты і выпуск прадукцыі ваеннага прызначэння, фарміруюцца стратэгічныя запасы.
“У нашым рэгіёне зноў узрастае роля ядзернага стрымлівання, а таксама высокадакладнай неядзернай зброі сярэдняй далёкасці. Усё гэта азначае пераход ад мірнага суіснавання да канцэпцыі працяглага супрацьстаяння”, – сказаў ён, адзначыўшы, што Мінск зацікаўлены ў нармалізацыі сітуацыі ў сферы глабальнай і рэгіянальнай бяспекі, у аднаўленні парадку, адзінага для ўсіх.
У кантэксце міжнароднага ваеннага супрацоўніцтва Рэвенка назваў наступныя прыярытэты:
- падтрыманне стратэгічнага ўзроўню супрацоўніцтва з Расійскай Федэрацыяй;
- шматбаковае ваеннае супрацоўніцтва ў рамках АДКБ, СНД і ШАС, супрацоўніцтва з іх дзяржавамі-ўдзельніцамі на двухбаковай аснове;
- развіццё стратэгічнага партнёрства з Кітайскай Народнай Рэспублікай;
- ваеннае супрацоўніцтва з краінамі Блізкага Усходу і Паўночнай Афрыкі, Паўднёвай і Паўднёва-Усходняй Азіі, Афрыкі, Лацінскай Амерыкі;
- аднаўленне канструктыўнага ўзаемадзеяння па ваеннай лініі з краінамі Еўрапейскага рэгіёна і з ЗША.
