Паспорт Новой Беларуси. Фото: tsikhanouskaya.org
Грамадзянін Беларусі Дзмітрый, які выкарыстоўваў пашпарт Новай Беларусі пры абмене віду на жыхарства, не будзе пазбаўлены міжнароднай абароны. Пра гэта ён распавёў «Нашай Ніве».
Нагадаем, гісторыя нарабіла шуму ў лютым. Тады ініцыятыва Partyzanka распавяла пра грамадзяніна Беларусі, якога могуць пазбавіць міжнароднай абароны з-за выкарыстання пашпарта Новай Беларусі, а таксама папярэдзіла, што выкарыстанне такога дакумента можа быць пакарана крымінальнай адказнасцю. Пазней сам Дзмітрый паведаміў, што супрацоўнікі Управы па справах замежнікаў паставіліся да пашпарта з цікавасцю, а праблемы ўзніклі з-за таго, што ва ўправе вырашылі, нібыта ён атрымаў новы беларускі пашпарт. Таму была распачата вытворчасць па пераглядзе яго статусу дадатковай абароны.
Цяпер у гісторыі пастаўлена кропка. Дзмітрый атрымаў рашэнне Управы па справах замежнікаў аб спыненні справы па пераглядзе яго статусу. Ён распавёў выданню, што ва ўправе прынялі да ўвагі яго довады, а таксама пераканаліся, што пазначаны ім пры замене дакумента аб відзе на жыхарства пашпарт не выдаецца беларускімі ўладамі. У выніку ва ўправе прыйшлі да высновы, што няма доказаў, якія дазволілі б пазбавіць Дзмітрыя дадатковай абароны. Статус можна страціць, калі яго ўладальнік здзейсніць паездку ў краіну пражывання або атрымае новы дакумент. Аднак ва ўправе папярэдзілі, што ў выпадку выяўлення іншых доказаў справа можа быць адноўлена.
У дакуменце таксама ўказана, што прадстаўнікі беларускай апазіцыі праінфармавалі ўправу пра выдачу 500 такіх пашпартоў на пачатак лютага.
“Пашпарт Новай Беларусі знаходзіцца па-за сістэмай фармальнага міжнароднага прызнання”, – напісана ў дакуменце.