Аляксандр Лукашэнка падчас сённяшніх кадравых прызначэнняў пашкадаваў аб адсутнасці ў Беларусі партыйнай вертыкалі.
«Нам трэба зберагчы нашу краіну ад катаклізмаў і войнаў, каб мы спакойна, ціха рабілі сваю справу. І каб Беларусь развівалася такімі тэмпамі, як цяпер. Была прыгожым, утульным месцам для жыцця нашых людзей. У нас ёсць усё», — сказаў ён, перадае яго прэс-служба.
Працягваючы настаўляць прызначэнцаў, ён узгадаў пра партыйную вертыкаль КПСС у Савецкім Саюзе.
«Я вам кажу пра эканоміку, арганізацыю вашай працы, але не забывайце, што вы і палітыкі там, на месцах. Райкамаў партыі няма, на жаль. Я ўжо сёння адчуваю гэты недахоп. На месцах усё ж тады… Шмат было лухты, але партыйныя органы назіралі за тым, што адбываецца. І паглядзіце: Кітай узяў нашу сістэму. Развіваецца як след, таму што сістэма працуе. Там шапказакідальніцтвам ніхто не займаецца», — сказаў ён.
Трэба адзначыць, што шкадаванне з нагоды адсутнасці партыйнай вертыкалі Лукашэнка выказвае не ўпершыню. Пры гэтым у апошнія гады было прынята рашэнне аб стварэнні партыі «Белая Русь», асновай для якой стала аднайменнае грамадскае аб’яднанне. Можна было чакаць, што «Белая Русь» стане «кіроўнай» партыяй у Беларусі, аднак узмацнення яе ролі не адбылося. Лукашэнка па-ранейшаму аддае перавагу вертыкалі, выбудаванай пад яго, без удзелу партыйных структур, хоць публічна і пастаянна шкадуе пра страчаную.
«Ведаю, што мяне пасля гэтай заўвагі пачнуць крытыкаваць, што мы тут па слядах кітайцаў ідзём. На жаль (я Сі Цзіньпіну нядаўна казаў), мы страцілі гэты след. Мы ўжо па слядах кітайцаў наўрад ці пойдзем, нават калі захочам.
Але задачы будуць стаяць вельмі сур’ёзныя. І палітычныя, і вось на поўдні вельмі актуальная — бяспека нашых людзей. Павінен сказаць, што Іван Іванавіч Крупко малайчына ў гэтым плане. Ды і ў Брэсцкай вобласці яны не адмахваюцца ад гэтых пытанняў. Не кажучы ўжо пра Гродзенскую, дзе генерал камандуе. Таму давядзецца і гэтымі пытаннямі займацца. Такое наша жыццё», — заключыў Лукашэнка.
