Аляксандр Лукашэнка сёння прызначыў трох памочнікаў — інспектараў па рэгіёнах. Сярод прызначэнняў звяртае на сябе ўвагу вяртанне ў лік службовых асоб Надзеі Каткавец.
Як паведамілі ў прэс-службе Лукашэнкі, яна стала памочнікам — інспектарам па Магілёўскай вобласці.
Надзея Каткавец праславілася заявай пра «хаатычныя цэны» падчас валютнага крызісу 2011 года. Яна працавала намеснікам міністра сельскай гаспадаркі і харчавання. Таксама за яе плячыма праца ў ЕЭК. У 2013–2017 гадах яна была намеснікам кіраўніка спраў прэзідэнта. Пазней Каткавец працавала ў кіраўніцтве БНБК.
У чэрвені гэтага года Надзея Каткавец суправаджала Аляксандра Лукашэнку падчас наведвання прадпрыемства «БелІнтэрГен-агра» ва Уздзенскім раёне. Лукашэнка тады звяртаўся персанальна да яе. У паведамленні пра візіт Каткавец была прадстаўлена як кандыдат эканамічных навук, без указання пасады і месца працы.
Таксама сёння Лукашэнка прызначыў памочнікам — інспектарам па Гомельскай вобласці Юрыя Валяватага, які да гэтага працаваў першым намеснікам старшыні Гродзенскага аблвыканкама.
Памочнікам — інспектарам па Мінску стаў Дзмітрый Рэуцкі.
