Павел Латушко. Фото: t.me/latushka
Намеснік кіраўніка Аб’яднанага пераходнага кабінета Беларусі і кіраўнік НАУ Павел Латушка заявіў, што санкцыі Украіны супраць Аляксандра Лукашэнкі з’яўляюцца важным палітычным сігналам рэжыму і падтрымкай дэмакратычных сіл Беларусі. Паводле яго слоў, увядзенне персанальных абмежаванняў пацвярджае, што Кіеў не лічыць Лукашэнку законным і легітымным прэзідэнтам краіны.
«Таксама ўкраінскі бок прызнае яго ролю ў злачынствах, учыненых ім асабіста і прадстаўнікамі яго рэжыму, уключаючы злачынствы агрэсіі, ваенныя злачынствы і злачынствы супраць чалавечнасці», – адзначыў ён.
Ён падкрэсліў, што Украіна афіцыйна пацвярджае датычнасць службовых асоб рэжыму і самога Лукашэнкі да незаконнага перамяшчэння ўкраінскіх дзяцей. Раней НАУ перадала дзве адпаведныя камунікацыі з доказамі ў Офіс пракурора Міжнароднага крымінальнага суда.
«Мы таксама сабралі і перадалі з дапамогай нашых літоўскіх партнёраў матэрыялы для прыцягнення Лукашэнкі да адказнасці за злачынствы супраць чалавечнасці, а цяпер абагульняем адпаведныя матэрыялы, якія даказваюць удзел рэжыму Лукашэнкі ў агрэсіі супраць Украіны для спецтрыбунала, які ствараецца», — адзначыў палітык.
Сярод падстаў для санкцый украінскі бок указвае ўдзел больш за 3 тысяч беларускіх прадпрыемстваў у кааперацыі з расійскім ваенна-прамысловым комплексам, а таксама разгортванне ў другой палове 2025 года інфраструктуры для кіравання ўдарнымі беспілотнікамі, якая выкарыстоўваецца для каардынацыі атак па тэрыторыі Украіны. Кіеў таксама заяўляе пра пастаўкі праз Беларусь заходніх кампанентаў і абсталявання, якія могуць выкарыстоўвацца ў ваенных мэтах у абыход санкцый.
9 верасня 2024 года Павел Латушка накіраваў зварот дарадцу-ўпаўнаважанаму прэзідэнта Украіны па пытаннях санкцыйнай палітыкі Уладзіславу Уласюку з прапановай падтрымаць гарманізацыю гандлёвых санкцый у дачыненні да рэжыму Лукашэнкі і Расіі. Паводле слоў палітыка, Уласюк публічна падтрымаў ідэю збліжэння санкцыйных падыходаў да двух рэжымаў.
«Акрамя таго, сярод прапанаваных намі ўкраінскаму боку мер можна назваць узмацненне транзітных абмежаванняў і пашырэнне гандлёвых санкцый. Мы будзем ініцыяваць і ўносіць на разгляд украінскага боку прапановы па ўвядзенні дадатковых санкцыйных абмежаванняў на рэжым Лукашэнкі, а таксама зацікаўлены ва ўзаемадзеянні для лабіравання адпаведных санкцыйных рашэнняў у рамках ЕС», — заявіў сёння Павел Латушка.
Каментуючы інфармацыю пра размяшчэнне ў Беларусі ракет сярэдняй далёкасці «Арэшнік», ён адзначыў, што такія дзеянні павышаюць пагрозы рэгіянальнай бяспекі і робяць краіну мішэнню для магчымага адказнага ўдару.
«Мы зацікаўлены ў пашырэнні супрацоўніцтва з афіцыйным Кіевам па пытанні дасягнення адказнасці Лукашэнкі за ваеннае злачынства — незаконнае перамяшчэнне ўкраінскіх дзяцей, па пытанні адказнасці Лукашэнкі за здзяйсненне акту агрэсіі супраць Украіны, а таксама разлічваем на падтрымку нашых намаганняў па дасягненні адказнасці за здзяйсненне злачынстваў супраць чалавечнасці ў рамках Міжнароднага крымінальнага суда, улічваючы, што Украіна ўжо з’яўляецца членам МКС», — падсумаваў палітык.
Нагадаем, прэзідэнт Украіны Уладзімір Зяленскі 18 лютага ўвёў санкцыі ў дачыненні да Аляксандра Лукашэнкі. Санкцыі ўведзены ў тым ліку за разгортванне ў Беларусі сістэмы рэтранслятараў для кіравання ўдарнымі дронамі і прадугледжваюць пазбаўленне Лукашэнкі дзяржаўных узнагарод Украіны, блакіроўку актываў, абмежаванне гандлёвых аперацый, абмежаванне транзіту, забарону на ўдзел у прыватызацыі і інш.
Раней санкцыі супраць Лукашэнкі ўвялі Еўрапейскі саюз, ЗША, Японія, Канада, Швейцарыя і Новая Зеландыя.