Фото: facebook.com/LRKAM
Армія Літвы тэстуе сістэмы для знішчэння метэазондаў, якія выкарыстоўваюцца для кантрабанды. Паводле слоў міністра абароны краіны Робертаса Каўнаса, перад ваеннымі стаіць задача паражаць цэлі на вышыні 5–6 кіламетраў, піша Delfi са спасылкай на BNS.
Выступаючы перад журналістамі, кіраўнік абароннага ведамства падкрэсліў, што бягучыя выпрабаванні дазваляюць ацаніць прагрэс у абароне паветранай прасторы.
«Тэставанне паказвае, у якой сітуацыі мы знаходзімся і што рухаемся наперад. Мы чакаем вынікаў, абагульненай зводкі, таму што візуальнае дасягненне цэляў — гэта адно, але нам трэба атрымаць дадзеныя і выпрацаваць шлях далейшага ўдасканалення сістэм, каб дасягнуць канчатковай мэты: каб шары былі дасяжнымі не толькі на вышыні некалькіх сотняў метраў, а менавіта на вышыні 5–6 кіламетраў», — заявіў міністр.
Паводле яго слоў, не толькі Літва, але і «ўвесь свет шукае спосаб» барацьбы з метэазондамі.
«Наша мэта — мець сродкі прэвенцыі, бо сёння да шароў падвешваюць цыгарэты, але ў любы момант можна прымацаваць не цыгарэты, а значна больш небяспечную прыладу. Таму мы бачым сэнс атрымаць рашэнні для барацьбы з імі», — заявіў кіраўнік абароннага ведамства.
Раней паведамлялася, што практычная адпрацоўка тэхналогій прайшла на палігоне ў Пабрадзе ў рамках вучэнняў C.U.A.S. February 26. Падчас гэтых манеўраў прадстаўнікі індустрыі бяспекі і абароны дэманстравалі абсталяванне для выяўлення, перахопу і знішчэння дронаў-камікадзэ і паветраных шароў.
За вучэннямі назіралі прадстаўнікі дзяржаўных устаноў, навуковай супольнасці і венчурных фондаў. Як падкрэслілі ў арміі, мэта гэтых выпрабавальных вучэнняў — дапамагчы ўстановам, якія ажыццяўляюць планаванне і закупкі, адабраць найбольш эфектыўныя рашэнні для барацьбы з паветранымі пагрозамі.
Увага да аховы паветранай прасторы ў Літве ўзмацнілася пасля інцыдэнтаў лета мінулага года, калі на тэрыторыю краіны заляцелі два расійскія дроны «Гербера». Сітуацыю ўскладняюць рэгулярныя запускі шароў з кантрабандай з боку Беларусі, якія неаднаразова прыводзілі да збояў у працы літоўскіх аэрапортаў.
Міністэрства эканомікі і інавацый у канцы кастрычніка мінулага года выдзеліла 1 млн еўра на закупку інавацыйных ідэй па абароне неба ад метэазондаў. Да лістапада ведамства атрымала 35 заявак ад бізнесу, з якіх плануецца адабраць найбольш эфектыўнае тэхналагічнае рашэнне і набыць яго.