Крэмль разлічвае на прагматычныя кантакты з новым кіраўніцтвам Венгрыі. Пра гэта заявіў прэс-сакратар прэзідэнта РФ Дзмітрый Пяскоў.
“Венгрыя зрабіла свой выбар, мы з павагай ставімся да гэтага выбару, мы разлічваем на тое, што мы працягнем нашы даволі прагматычныя кантакты з новым кіраўніцтвам Венгрыі. Мы чулі заявы тым больш пра гатоўнасць весці дыялог, зразумела, гэта будзе карысна і для Масквы, і для Будапешта”, – сказаў ён.
Ён таксама прапанаваў пачакаць і паглядзець, якімі будуць далейшыя крокі пераможцы выбараў Петэра Мадзьяра.
“Якія будуць дзеянні новага кіраўніцтва Венгрыі, ну, напэўна, трэба набрацца цярпення і паглядзець, што будзе адбывацца. Мы, яшчэ раз паўтараю, зацікаўлены ў выбудоўванні добрых адносін з Венгрыяй, як і з усімі краінамі Еўропы. Мы ведаем, што ў дачыненні да еўрапейскіх краін пакуль, на жаль, пра ўзаемнасць гаварыць не даводзіцца, але Расія адкрытая да дыялогу”, – дадаў ён.
Нагадаем, выбары, якія прайшлі ў Венгрыі ў нядзелю, паклалі канец кіраванню Віктара Орбана, які быў найбольш прарасійскім палітыкам у краінах ЕС. Апублікаваныя ў апошнія тыдні размовы Орбана з Пуціным, а таксама міністра замежных спраў Венгрыі Петэра Сіярта ўказвалі на іх гатоўнасць падтрымліваць Крэмль усімі магчымымі спосабамі.
