Еўракамісія прыняла стратэгію падтрымкі рэгіёнаў, якія мяжуюць з Беларуссю, Расіяй і Украінай.
“Ад гібрыдных пагроз да дэмаграфічнага ціску і эканамічнага ўздзеяння. Нашы ўсходнія рэгіёны, якія мяжуюць з Расіяй, Беларуссю і Украінай, сутыкаюцца з мноствам праблем. Мы павінны падтрымаць гэтыя рэгіёны і прадэманстраваць сваю салідарнасць. Таму што наша бяспека залежыць ад іх сілы, устойлівасці і стабільнасці.
З дапамогай сённяшняй стратэгіі ў дачыненні да ўсходніх памежных рэгіёнаў мы ўмацоўваем іх бяспеку, адначасова стымулюючы рост і рэгіянальны дабрабыт. Каб абараніць тых, хто абараняе нас”, – заявіла старшыня ЕК Урсула фон дэр Ляен.
Як распавялі ў прэс-службе Еўракамісіі, стратэгія прадугледжвае пяць прыярытэтных абласцей.
У галіне бяспекі гаворка ідзе пра праграму Eastern Flank Watch, а таксама праграмы ў сферы абароны ад беспілотнікаў, ППА і падобнае.
Падтрымаць рэгіянальны рост у Еўракамісіі хочуць праз механізм EastInvest, прызначаны дапамагчы зацікаўленым краінам атрымаць крэдытную і кансультацыйную падтрымку. У ім будзе задзейнічаны Еўрапейскі інвестыцыйны банк і іншыя міжнародныя фінансавыя інстытуты. ЕК таксама будзе супрацоўнічаць з Сусветным банкам.
“Прыярытэтная ўвага надаецца інтэграцыі электраэнергетычных прадпрыемстваў краін Балтыі з еўрапейскімі сеткамі і развіццю трансгранічнай вадароднай інфраструктуры, такой як Скандынаўска-Балтыйскі вадародны калідор”, – гаворыцца ў паведамленні.
Таксама будзе аказана садзейнічанне развіццю сувязі і мадэрнізацыі транспартнай сеткі, уключаючы дарогі двайнога прызначэння, чыгуначную і партовую інфраструктуру, а таксама трансгранічныя сувязі з Украінай і Малдовай.
Падтрымка будзе аказана адукацыі, СМІ і барацьбе з дэзінфармацыяй.
Еўракамісія мае намер 26 лютага правесці першы палітычны дыялог на высокім узроўні, які будзе садзейнічаць абмеркаванню дзеянняў ЕС і іх уплыву на ўстойлівасць і развіццё ўсходніх рэгіёнаў ЕС, што мяжуюць з Расіяй, Беларуссю і Украінай.
