Дырэктар унітарнага прадпрыемства “НТЦ “ЛЭМТ” БелОМА” акадэмік НАН Беларусі Аляксей Шкадарэвіч прыбыў у М’янму на чале беларускай дэлегацыі.
Беларусы паспелі сустрэцца з міністрам навукі і тэхналогій доктарам Мьо Тэйн Чжо (Dr. Myo Thein Kyaw) і міністрам інвестыцый і знешнеэканамічных сувязяў доктарам Ва Ва Маунг (Dr. Wah Wah Maung).
“Падчас сустрэчы бакі правялі адкрыты і сяброўскі абмен меркаваннямі па пытаннях супрацоўніцтва ў сферы навукі і тэхналогій, якая з’яўляецца адным з напрамкаў узаемадзеяння ў рамках Дарожнай карты па развіцці супрацоўніцтва паміж М’янмай і Беларуссю на 2026–2028 гады, падпісанай падчас візіту прэзідэнта Рэспублікі Беларусь у М’янму, а таксама па пытаннях садзейнічання інвестыцыям для развіцця навукова-тэхналагічнай сферы М’янмы, забеспячэння перадачы тэхналогій, якія спрыяюць розным вытворчым галінам праз навукова-даследчыя і доследна-канструктарскія работы, і пашырэння гандлёва-эканамічных сувязяў паміж дзвюма краінамі”, – перадае прэс-служба Міністэрства інвестыцый і знешнеэканамічных сувязяў М’янмы.
Аналагічна апісана і сустрэча ў Міністэрстве навукі і тэхналогій.
“Падчас сустрэчы бакі правялі сяброўскае і адкрытае абмеркаванне пытанняў супрацоўніцтва паміж М’янмай і Рэспублікай Беларусь у мэтах развіцця навукі і тэхналогій, а таксама развіцця чалавечых рэсурсаў”, – гаворыцца ў паведамленні.
НТЦ “ЛЭМТ” больш за 30 гадоў спецыялізуецца на даследаваннях, распрацоўцы, вытворчасці і мадэрнізацыі оптаэлектронных і лазерных прыбораў. Асноўнымі напрамкамі дзейнасці прадпрыемства з’яўляюцца аптычныя прыцэлы і прыцэльныя комплексы для лёгкага стралковага ўзбраення, лазерныя далямеры, лазерныя сістэмы кіравання агнём, шматканальныя сістэмы назірання і прыцэльвання, сістэмы процідзеяння БПЛА.
