Суд Калінкавіцкага раёна вынес абвінаваўчы прысуд 50-гадоваму мясцоваму жыхару за незаконнае паляванне на тэрыторыі нацыянальнага парку «Прыпяцкі». Дзяржаўнае абвінавачанне падтрымала пракуратура раёна.
Паводле інфармацыі прэс-службы Генпракуратуры, у лютым 2026 года мужчына прыехаў у вёску Дзеравішча і, не маючы дазволу на паляванне і на захоўванне зброі, застрэліў самку дзіка ў паляўнічых угоддзях нацыянальнага парку. Тушу ён раздзелаў на месцы і перавёз дадому на самаробных санях. Пры аглядзе месца здарэння праваахоўнікі канфіскавалі скуру і канечнасці жывёлы. Шкоду навакольнаму асяроддзю ацанілі ў 5,4 тысячы рублёў.
На судзе мужчына прызнаў віну і патлумачыў, што двухствольную стрэльбу яму падарыў знаёмы восенню 2025 года. Пры гэтым раней, у 2022 годзе, ён ужо прыцягваўся да крымінальнай адказнасці за незаконныя дзеянні са зброяй і браканьерства.
Суд прысудзіў яму 1,5 года калоніі ва ўмовах строгага рэжыму і пазбаўленне права займацца паляваннем на 5 гадоў. Таксама з яго спагнана шкода ў памеры 5,4 тысячы рублёў. Прысуд не ўступіў у законную сілу.