У сакавіку-красавіку гэтага года больш за 20 супрацоўнікаў Мінлясгаса былі затрыманыя па крымінальных справах. Большасць з іх абвінавачваецца ў атрыманні хабару, частка — у крадзяжы драўніны шляхам злоўжывання службовымі паўнамоцтвамі.
Сярод затрыманых — майстры лесу, дырэктары лясгасаў і галоўныя спецыялісты аднаго з ДВЛГА, паведамляе Мінлясгас.
Адзін з абвінавачаных, дырэктар лясгаса ў Віцебскай вобласці, у чэрвені 2025 года паспрыяў выдзяленню ліквідных дзялянак для нарыхтоўкі драўніны прыватнай асобе і афармленню ордараў па нарыхтоўцы драўніны. За свае паслугі ён атрымаў не менш за 240 рублёў і частку свіной тушы вагой не менш за 20 кілаграмаў.
Некаторыя з абвінавачаных былі затрыманыя за тое, што арганізоўвалі для ІП дробны водпуск драўніны на корані і дапамагалі адгрузіць з цэха больш якасныя піламатэрыялы, чым было прадугледжана дамовамі.
У некаторых выпадках памер хабару складаў усяго некалькі сотняў рублёў, але былі і буйныя хабары. Кіраўнік аднаго з лясгасаў Магілёўскай вобласці абвінавачваецца ў атрыманні хабару ў асабліва буйным памеры (амаль 240 тысяч рублёў) ад прадстаўніка камерцыйнай структуры за заключэнне дамоваў на аказанне паслуг па распілоўцы і транспартаванні круглых лесаматэрыялаў хвойных парод і іх своечасовую аплату.
Некаторыя работнікі ўжо вызваленыя ад займаемых пасад па дыскрэдытуючых абставінах. У дачыненні да шэрагу кіраўнікоў вызначаецца мера адказнасці за непрыняцце належных мер па кантролі дзейнасці падначаленых.
