Сёлетняй вясной распачнецца знакамітае Венецыянскае біенале, у Германіі пройдзе вандроўная «Маніфеста», у Парыжы, Вене, Амстэрдаме, Венецыі і Мадрыдзе рыхтуюць важныя выставы, якія пераасэнсоўваюць творчасць асобных майстроў і актуалізуюць разуменне мастацкіх стыляў. Сабралі самыя знакавыя мастацкія выставы і біенале 2026-га.
«Метамарфозы» ў Рэйксмузеум і галерэі Баргезе (Амстэрдам і Рым)
6 лютага — 25 мая ў Рэйксмузеум, Амстэрдам; 22 чэрвеня — 20 верасня ў галерэі Баргезе, Рым
Гэтая знакавая выстава пакажа тытанаў гісторыі мастацтва — ад Караваджа да Магрыта, ад Рэмбранта да Буржуа — у дзвюх арт-сталіцах Еўропы. Гэтых вельмі розных майстроў аб’яднаюць «Метамарфозы» Авідзія, паэма, напісаная больш чым 2000 гадоў таму, у якой старажытнарымскі паэт раскрывае тэмы трансфармацыі і пераўтварэнняў – багоў і людзей у жывёл, расліны, сузор‘і ці камяні, а таксама адносіны паміж чалавецтвам і прыродай.
Кожны з аўтараў у свой час, па меркаванні куратараў выставы, супернічаў з Авідзіем па багацці ўяўлення і арыгінальнасці мастацкага бачання.
Выстава Чыхару Шыёта «Ніткі жыцця» ў Галерэі Хейварда (Лондан, Вялікабрытанія)
17 лютага — 3 мая
Японская мастачка ахутае галерэю сваёй фірмовай шырокай сеткай ваўняных нітак і прадметаў — ствараючы эмацыйна насычаныя інсталяцыі.
Чыхару Шыёта найбольш вядомая сваімі буйнамаштабнымі інсталяцыямі, якія паглынаюць звычайныя прадметы, такія як абутак, ключы, ложкі, крэслы і сукенкі, велізарным павуціннем з нітак.
Яе творы часта абапіраюцца на асабісты вопыт, які аўтарка пашырае да ўніверсальных пытанняў, такіх як жыццё, смерць і стасункі.
«Рэнуар і каханне. Шчаслівая сучаснасць» у Музеі Арсэ (1865–1885) (Парыж, Францыя)
17 сакавіка — 19 ліпеня
Важная постаць імпрэсіянізму П’ер Агюст Рэнуар лічыцца адным з вялікіх мастакоў XIX стагоддзя. З сярэдзіны 1860-х да 1880-х гадоў ён развіваў уласны стыль жывапісу, напоўнены святлом і колерам, а таксама новыя тэмы, засяроджаныя на ўзаемаадносінах паміж мужчынамі і жанчынамі.
Выстава, арганізаваная сумесна з Нацыянальнай галерэяй у Лондане і Музеем прыгожых мастацтваў у Бостане, пераглядае фундаментальны ўклад Рэнуара ў імпрэсіянізм і гісторыю мастацтва ХІХ стагоддзя праз складанае, універсальнае паняцце любові — цэнтральнай рухаючай сілы яго творчасці. Выстава прапануе новы погляд на яго карціны, настолькі вядомыя, што стала цяжка зразумець, наколькі яны былі ў свой час радыкальнымі.
Выстава Анры Русо «Амбіцыі жывапісу» ў Музеі Аранжэры (Парыж, Францыя)
25 сакавіка – 20 ліпеня
Анры Русо — важны мастак XIX стагоддзя, адзін з самых значных прадстаўнікоў наіўнага мастацтва. Ён быў самавукам і чэрпаў натхненне ў ілюстраваных кнігах, каб паказаць экзатычныя пейзажы, сцэны ў джунглях, населеныя незвычайнымі жывёламі, якіх ён ніколі не бачыў на свае вочы.
Але за гэтай экзотыкай хаваецца больш складаны і багаты мастак, чым здаецца на першы погляд. Музей хоча зноў прыцягнуць увагу да Анры Русо, каб уважліва разгледзець свет гэтага дзіўнага творцы.
Выстава арганізавана ў супрацоўніцтве з Фондам Барнса з Філадэльфіі (ЗША). Абедзве ўстановы захоўваюць у сваіх калекцыях важныя творы Русо. Экспазіцыя ўключае каля пяцідзесяці карцін, некаторыя з якіх вельмі вядомыя, але рэдка выстаўляюцца ў Францыі.
61-я Венецыянская біенале (Венецыя, Італія)
9 мая — 22 лістапада
Адзін з самых прэстыжных у свеце фестываляў сучаснага мастацтва сёлета мае кранальную тэму «У мінорнай танальнасці», задуманую Койо Куо — першай афрыканскай жанчынай, якая ўзначаліла біенале. На жаль, Куо нечакана ў маі 2025 года, але яе бачанне будзе ўвасоблена куратарскай камандай, якую яна сабрала.
Па словах стваральнікаў біенале, тэма прапануе мастакам і гледачам пагрузіцца ў медытатыўны, летуценны і злёгку меланхалічны стан, навеяны «мінорнымі тонамі». Адной з крыніц натхнення для праекта паслужыў джаз як адзін з самых імправізацыйных музычных кірункаў.
Куратарка ўкладала ў назву біенале таксама і іншы сэнс – пачуць меншыя, ціхія, нязначныя, другарадныя галасы мастацтва, зірнуць на свет з альтэрнатыўнага, меланхалічнага і сузіральнага пункту гледжання. Гэта павінна быць гісторыя пра пяшчоту, уважлівасць і працу на нізкіх рэгістрах.
Біенале Matter of Art (Прага, Чэхія)
12 чэрвеня — 13 верасня
Біенале Matter of Art у чацвёрты раз ладзіць чэшская арганізацыя «Транзіт», чыя дзейнасць кіруецца фемінісцкімі прынцыпамі і імкнецца да гендарнай роўнасці, развіцця этычных і ўстойлівых адносін, а таксама да рэалізацыі ўніверсальнага права на доступ да культуры.
Кожны год біенале давяраюць маладым куратарам з Усходняй Еўропы. Гэтым разам гэта будуць мясцовыя куратары Яраслава Таманава і Францішак Фекетэ, а таксама Якуб Гаўкоўскі з мастацкага музея ў Лодзі. «Matter of Art» будзе адбывацца ў нечаканых прасторах Прагі і будзе прэзентаваць працы мастакоў, што падымаюць складаныя сацыяльныя і палітычныя праблемы.
Нагадаем, што ў 2024 годзе на біенале Matter of Art адным з куратараў быў беларускі даследчык Аляксей Барысёнак.
«Аніш Капур» у Hayward Gallery (Лондан, Вялікабрытанія)
16 чэрвеня – 18 кастрычніка
У цэнтры выставы будуць прадстаўлены тры манументальныя творы вядомага брытанска-індыйскага скульптара, якія залучаюць нас у пераасэнсаванне нашых уяўленняў аб прысутнасці і пустаце.
Кантрапунктам для іх стануць працы, у якіх мастак выкарыстаў сто адсоткаў чорнага ў чорным, то-бок знакаміты пігмент Vantablack, які паглынае падаючае святло амаль цалкам.
Manifesta 16 (Рурскі раён, Германія)
21 чэрвеня — 4 кастрычніка
Manifesta — гэта еўрапейская качавая біенале сучаснага мастацтва, якая змяняе гарады правядзення кожныя два гады, паказваючы выставы, гарадскія інтэрвенцыі і публічныя праграмы, якія адлюстроўваюць мясцовыя культурныя, сацыяльныя і палітычныя кантэксты.
Сёлета біенале пройдзе ў Рурскім рэгіёне Германіі, разгортваючыся ў некалькіх гарадах гэтага постіндустрыяльнага рэгіёну, які дзесяцігоддзямі быў сейсмографам еўрапейскай напружанасці. Менавіта тут знаходзяцца адны з найбуйнейшых у Еўропе радовішчаў каменнага вугалю і цяжкіх металаў, а таксама аб’екты ваеннай, хімічнай і электроннай прамысловасці. Месца, на якое сёння звернута ўвага Еўропы: з аднаго боку, у кантэксце імкнення да незалежнасці ў вытворчасці электронных кампанентаў, з другога, у сувязі з настойлівай неабходнасцю скарачэння здабычы і вытворчасці ва ўмовах кліматычнага крызісу. Тут перасякаюцца палітычныя, эканамічныя і экалагічныя інтарэсы, якія вызначаюць нашу сучаснасць. У вандроўнай біенале ёсць амбіцыі дзейнічаць у доўгатэрміновай перспектыве: ініцыяваць працэсы, якія выходзяць за рамкі выставы і абяцаюць рэальныя сацыяльныя змены.
«Фрыда: стварэнне іконы» ў Tate Modern (Лондан, Вялікабрытанія)
25 чэрвеня 2026 — 3 студзеня 2027
Фрыда Кало — адна з самых вядомых фігур у гісторыі мастацтва, але як яна стала такім феноменам? Гэтая буйная рэтраспектыва ўключае больш за 130 работ, у тым ліку некаторыя з яе самых вядомых карцін, а таксама дакументы, фатаграфіі і памятныя рэчы з архіваў Кало. Выстава дэманструе яе «мноства я» — адданую жонку, інтэлектуала, сучаснага мастака і палітычнага актывіста, а таксама — працы больш за 80 яе сучаснікаў і мастакоў, якіх яна натхніла. Гэта даследаванне таго, як жанчыны-мастачкі змянілі мастацтва XX стагоддзя.
Габелен Байё ў Брытанскім музеі (Лондан, Вялікабрытанія)
Восень 2026 — лета 2027
70-метровы габелен Байё пакідае Францыю, каб упершыню з моманту стварэння амаль 1000 гадоў таму наведаць Вялікабрытанію. Ён паказвае нармандскае ўварванне 1066 года і бітву пры Гасцінгсе і з’яўляецца адным з найважнейшых візуальных дакументаў у гісторыі. Брытанскі музей будзе выкарыстоўваць уласную калекцыю і экспанаты з іншых музеяў, каб распавесці поўную гісторыю гэтага бурнага перыяду.
«Восіп Цадкін» у KMSKA (Антверпэн, Бельгія)
31 кастрычніка — 18 красавіка 2027
Каралеўскі музей прыгожых мастацтваў у Антвэрпэне пакажа творы Восіпа Цадкіна, мастака «Парыжскай школы», родам з Віцебска.
Хоць творца атрымаў сусветную вядомасць у Парыжы, яго першая рэтраспектыўная выстава адбылася ў Бруселі. Восіп Задкін быў нястомным і пладавітым мастаком: сёння налічваецца больш за 600 скульптур, больш за 750 гуашаў і малюнкаў, а таксама каля 200 літаграфій і афортаў.
На выставе пакажуць шматгранны даробак Цадкіна, а таксама працы яго жонкі Валянціны Пракс, бельгійскіх сучаснікаў і вучняў.
Падпісвайцеся на культурныя навіны Reform.news у Telegram
