Студыя imago.by надрукавала лімітаваныя асобнікі Радзівілаўскай карты Вялікага Княства Літоўскага 1613 года, якая была выкуплена ініцыятывай MALDZIS.
Радзівілаўскую карту ВКЛ цяпер можна набыць у двух варыянтах афармлення: з драўлянымі падвесамі (MALDZIS VIP) і без іх.
Радзівілаўская карта — адзін з шэдэўраў еўрапейскай картаграфіі беларускага паходжання XVII стагоддзя.
Карта ахоплівае тэрыторыю ВКЛ у межах да Люблінскай уніі 1569 года і часткова землі суседніх краін. Ініцыятарам яе стварэння і мецэнатам быў князь Мікалай Крыштоп Радзівіл Сіротка, і ў выніку карта ўвайшла ў гісторыю пад ягоным прозвішчам. Аўтарам эскізу карты з’яўляецца нясвіжскі гравёр Тамаш Макоўскі.
Радзівілаўская карта была шырока вядомая ў Еўропе і да гэтага часу застаецца каштоўнай гістарычнай крыніцай. На ёй пазначаныя звыш 1000 населеных пунктаў, з якіх больш за 300 — на землях сучаснай Беларусі.
Першаўзор Радзівілаўскай карты быў створаны ў Нясвіжы блізу 1603 года, але да нашых часоў не захаваўся. Шырокую вядомасць карта набыла дзякуючы выданню 1613 года, выкананага галандскім гравёрам Геселем Герыцам у Амстэрдаме для картаграфічнай майстэрні Вілема Янсана Блаў.
З 1631 года Радзівілаўская карта далучалася да атласа выдавецтва Блаў «Appendix Theatri A. Ortelii et Atlantis». Асобнік «Мальдзіса» з’яўляецца адным з першых атласных выданняў карты.
17 траўня, у Ноч музеяў, разам яшчэ з чатырма гісторыка-культурнымі каштоўнасцямі Радзівілаўская карта была паказана ў варшаўскім Музеі Вольнай Беларусі. Плануецца, што частку набытых экспанатаў вернуць у Беларусь. Статут ВКЛ і Радзівілаўская карта ВКЛ XVII стагоддзя ўжо прыпісаныя да канкрэтных музеяў, куды іх мяркуюць перадаць: краязнаўчага музея ў Наваградку і Нясвіжскага замка.
Падпісвайцеся на культурныя навіны Reform.news у Telegram