Следчы камітэт узбудзіў крымінальную справу ў дачыненні да службовых асоб прадстаўніцтва замежнай арганізацыі па ч. 3 арт. 243 (“Ухіленне ад уплаты падаткаў, збораў у асабліва буйным памеры”) КК. Падставай для ўзбуджэння крымінальнай справы паслужылі матэрыялы ДФР Камітэта дзяржкантролю.
Паводле версіі следства, прадстаўніцтва замежнай арганізацыі фактычна займалася камерцыйнай дзейнасцю, не маючы на гэта права.
“Фактычнымі арганізатарамі і выканаўцамі супрацьпраўнай схемы выступілі службовыя асобы прадстаўніцтва замежнай арганізацыі. Яны стварылі і на працягу доўгага перыяду падтрымлівалі бачнасць законнай дзейнасці, зарэгістраваўшы ў Беларусі прадстаўніцтва, якое па сваім прававым статусе не мела права ажыццяўляць камерцыйную (прадпрымальніцкую) дзейнасць. Пры гэтым рэальныя мэты і аб’ёмы аперацый цалкам адпавядалі камерцыйным інтарэсам замежнай кампаніі і выходзілі далёка за межы прадстаўніцкіх функцый.
У выніку рэалізацыі тавараў на тэрыторыі Рэспублікі Беларусь была атрымана значная выручка, якая падлягала абкладанню падаткам на прыбытак, аднак названы плацеж у бюджэт дзяржавы не ўносіўся”, — гаворыцца ў паведамленні СК.
Следчыя правялі допыты фігурантаў, прааналізавалі фінансавую дзейнасць прадстаўніцтва і сабралі доказы. Пасля гэтага замежная арганізацыя пералічыла грошы.
“На працягу трох сутак пасля ўзбуджэння крымінальнай справы замежная арганізацыя добраахвотна пералічыла з-за мяжы больш за 60 млн беларускіх рублёў у мэтах пакрыцця нанесенай шкоды і забеспячэння магчымых маёмасных спагнанняў. Гэтыя сродкі ўнесены на дэпазітны рахунак Следчага камітэта і на іх неадкладна накладзены арышт у парадку, прадугледжаным крымінальна-працэсуальным заканадаўствам.
Пазней прадстаўнікі арганізацыі афіцыйна заявілі пра намер у далейшым весці камерцыйную дзейнасць на тэрыторыі Беларусі выключна ў прававым полі, строга выконваючы патрабаванні заканадаўства”, — расказалі ў СК.
Паводле інфармацыі Камітэта дзяржкантролю, папярэдне ўстаноўленая сума нявыплачанага падатку на прыбытак склала звыш 3- млн рублёў. Кампанія займалася рэалізацыяй тавараў беларускім суб’ектам гаспадарання.
Назва кампаніі, а таксама сфера яе дзейнасці не называюцца.
У СК таксама нагадалі, што замежныя арганізацыі, якія ажыццяўляюць прадпрымальніцкую дзейнасць на тэрыторыі краіны, павінны ў поўным аб’ёме плаціць устаноўленыя падаткі і зборы. Весці дзейнасць можна праз рэгістрацыю пастаяннага прадстаўніцтва з правам вядзення камерцыйнай дзейнасці, адкрыццё філіяла або стварэнне самастойнай юрыдычнай асобы.
