2-3 красавіка адбыўся візіт дарадцы Святланы Ціханоўскай па дыпламатычных пытаннях Дзяніса Кучынскага ў Італію. Ён быў прысвечаны замацаванню і рэалізацыі дамоўленасцей, дасягнутых падчас сустрэч, якія раней правяла Святлана Ціханоўская з кіраўніцтвам краіны. Разам з Дзянісам Кучынскім у перамовах прынялі ўдзел дарадца па парламенцкім супрацоўніцтве Анатоль Лябедзька і кіраўніца Беларускага грамадскага цэнтра ў Фларэнцыі пры Офісе Ціханоўскай Юлія Юхно.
Адбыліся сустрэчы ў Міністэрстве замежных спраў Італіі і канцылярыі прэм’ер-міністра, у прыватнасці з намеснікам дыпламатычнага дарадцы прэм’ер-міністра П’етра Сфера Карыні, а таксама намесніцай генеральнага сакратара і генеральнай дырэктаркай па палітычных пытаннях і міжнароднай бяспецы МЗС Сесіліяй Пічыёні.
Як распавялі ў Офісе Ціханоўскай, тэмамі сустрэч сталі:
- выкананне пагадненняў, дасягнутых пасля папярэдніх візітаў;
- сітуацыя з палітычнымі зняволенымі ў Беларусі;
- падтрымка і развіццё Міжнароднага гуманітарнага фонду;
- каардынацыя на «амерыканскім» і «еўрапейскім» напрамках;
- роля Італіі ў «Вялікай сямёрцы» ў кантэксце сітуацыі ў Беларусі;
- пытанні выдачы шэнгенскіх віз грамадзянам Беларусі ў Мінску;
- супрацоўніцтва з італьянскімі пасольствамі ў Вільнюсе і Варшаве.
Акрамя таго, быў праведзены шэраг перамоваў у парламенце Італіі, у прыватнасці гаворка ішла пра правядзенне мерапрыемства ў італьянскім Сенаце ў рамках «Чарнобыльскага тыдня», падтрымку беларускіх ініцыятыў, узаемадзеянне з дэпутацкай групай “За дэмакратычную Беларусь”.
Асаблівая ўвага была нададзена развіццю беларускай супольнасці ў Фларэнцыі. У сустрэчах прыняла ўдзел кіраўніца цэнтра беларускай дэмакратычнай супольнасці Юлія Юхно. Абмяркоўваліся пытанні падтрымкі дзейнасці цэнтра, развіцця шэлтара, сумесных культурна-сацыяльных праектаў, а таксама ўзаемадзеяння з мясцовымі ўладамі і парламентарыямі.
«Самае складанае пасля важных візітаў — давесці дасягнутыя дамоўленасці да канца. Менавіта таму гэты візіт адбыўся адразу пасля сустрэч на высокім узроўні — каб зафіксаваць і канчаткова аформіць усе прынятыя рашэнні. Візіт у Італію стаў важным крокам у каардынацыі міжнародных намаганняў у падтрымку дэмакратычнай Беларусі і пацвердзіў гатоўнасць італьянскіх партнёраў да далейшага супрацоўніцтва», – пракаментаваў Кучынскі.
