Кіраўнік Нацыянальнага алімпійскага камітэта Беларусі Віктар Лукашэнка злятаў у Турцыю на ўрадавым бізнес-джэце з бартавым нумарам EW-301PJ. Дадзеныя аб рэйсе зафіксаваны сэрвісам адсочвання палётаў AirNav Radar.
Самалёт вылецеў з Анталіі ў суботу, 5 красавіка, у 22:16 па мясцовым часе з невялікай затрымкай і прызямліўся ў Мінску ў нядзелю ў 3:41.
Вядома, што кіраўнік НАК прыняў удзел у XVIII міжнародным форуме этнаспорту, які праходзіў з 3 па 5 красавіка. У межах форуму Лукашэнка сустрэўся з прэзідэнтам Сусветнай канфедэрацыі этнаспорту Білалам Эрдаганам. Бакі абмеркавалі перспектывы супрацоўніцтва ў галіне этнічных відаў спорту, надаўшы асаблівую ўвагу будучаму Кубку наймацнейшых па гарадошным спорце ў Маладзечне ў канцы красавіка. Эрдаган станоўча ацаніў уступленне беларускай федэрацыі гарадошнага спорту ў канфедэрацыю і заявіў пра жаданне наведаць Мінск у гэтым годзе, паведамілі ў прэс-службе НАК.
Таксама адбыліся перамовы з міністрам спорту і маладзёжнай палітыкі Турцыі Асманам Ашкын Бакам. Бакі абмеркавалі паглыбленне супрацоўніцтва па лініі спартыўных федэрацый, правядзенне сумесных збораў і спаборніцтваў, развіццё дзіцяча-юнацкага спорту і абмен трэнерскім досведам. Паводле інфармацыі беларускага НАК, турэцкі міністр назваў несправядлівым адхіленне беларускіх спартсменаў ад міжнародных спаборніцтваў.
“Гэта няправільна і вельмі несправядліва. Зараз у свеце вялікая колькасць ваенных канфліктаў. Спадзяёмся, што ўжо ў хуткім часе беларускія спартсмены змогуць без абмежаванняў выступаць на міжнароднай арэне”, – прыводзіць камітэт яго словы.
Акрамя таго, Лукашэнка сустрэўся з міністрам спорту Расіі і старшынёй алімпійскага камітэта Расіі Міхаілам Дзегцяровым. Бакі абмеркавалі будучыя сумесныя мерапрыемствы, у тым ліку Нацыянальны форум атлетаў, Форум юных алімпійцаў і праект «Вытокі».
