Удзельнікі 36-й Сустрэчы беларусаў Паўночнай Амерыкі прапанавалі пачаць працу над стварэннем Сусветнага беларускага кангрэса. Форум прайшоў 5–7 верасня ў Нью-Ёрку, паведамілі Reform.news арганізатары.
Сустрэчу арганізавалі Беларуска-амерыканскае аб’яднанне і Згуртаванне беларусаў Канады. У ёй прынялі ўдзел каля ста чалавек, у тым ліку прадстаўнікі беларускіх арганізацый ЗША, Канады, Вялікабрытаніі і Польшчы.
Мяркуецца, што Сусветны беларускі кангрэс можа стаць прадстаўнічым і каардынацыйным органам, які аб’ядноўвае арганізацыі і супольнасці з розных краін. Пры гэтым удзельнікі падкрэслілі, што новая структура не павінна абмяжоўваць самастойнасць ужо існуючых арганізацый або браць на сябе іх функцыі.
Мадэль, структура, паўнамоцтвы і прынцыпы прадстаўніцтва кангрэса пакуль не вызначаны. Гэтыя пытанні прапануецца вынесці на шырокае абмеркаванне беларускай дыяспары.
Удзельнікі сустрэчы таксама прапанавалі стварыць рабочую групу па ўмацаванні прысутнасці Беларусі ў сусветнай інфармацыйнай прасторы. Яна павінна правесці аўдыт беларускіх інфармацыйных, навуковых, культурных і архіўных рэсурсаў, вызначыць асноўныя праблемы і падрыхтаваць доўгатэрміновую праграму дзеянняў.
Сярод прапаноў — стварэнне агульнадаступных крыніц пра Беларусь на беларускай і іншых мовах, паляпшэнне прадстаўлення краіны ў Вікіпедыі, міжнародных энцыклапедыях і адукацыйных рэсурсах, алічбоўка замежных беларускіх архіваў і падтрымка незалежных СМІ. Асобную ўвагу прапануецца надаць таму, як інфармацыя пра Беларусь прадстаўлена ў пошукавых сістэмах і прадуктах штучнага інтэлекту.
У прынятай па выніках форуму рэзалюцыі ўдзельнікі таксама заклікалі развіваць пастаянныя сувязі паміж арганізацыямі дыяспары, сумесныя праекты і міжнароднае прадстаўніцтва беларускіх інтарэсаў.
Сустрэчы беларусаў Паўночнай Амерыкі праводзяцца з 1952 года. У цяперашнім форуме ўдзельнічала старшыня Рады БНР Івонка Сурвіла. На ім таксама прагучалі звароты Зянона Пазняка, Паўла Севярынца і першаіерарха Беларускай аўтакефальнай праваслаўнай царквы архіепіскапа Святаслава.
