Генштаб УСУ заявіў пра паражэнне самалёта на расійскім аэрадроме «Ейск»

Рэдакцыя Reform.news · 24 кастрычніка 2026, 11:54

https://reform.news/be/genshtab-usu-zajavi-pra-parazhjenne-samaljota-na-rasijskim-ajeradrome-ejsk/

Сілы абароны Украіны паразілі самалёт на расійскім аэрадроме «Ейск» у Краснадарскім краі. Ступень пашкоджанняў удакладняецца, паведамляе Генеральны штаб УСУ.

Удары па аб’ектах на тэрыторыі Расіі наносіліся 23 кастрычніка і ў ноч на 24 кастрычніка.

Украінскі бок пацвердзіў паражэнне камбіната «Тальяцікаўчук» у Тальяці Самарскай вобласці. У раёне прадпрыемства зафіксавалі выбух і пажар. Завод вырабляе сінтэтычныя каўчукі, манамеры, вуглевадародныя фракцыі і высокаактанавыя дабаўкі да бензіну. Сінтэтычныя каўчукі, якія выпускаюцца прадпрыемствам, выкарыстоўваюцца ў тым ліку пры вытворчасці цвёрдага ракетнага паліва для тактычных і балістычных ракет.

Акрамя таго, Генштаб УСУ заявіў пра паражэнне асноўнага вытворчага будынка АТ «Протон-Электротекс» у Арле. Прадпрыемства выпускае оптаэлектроннае абсталяванне і камплектуючыя, якія прымяняюцца пры вытворчасці крылатых і балістычных ракет, а таксама ў зенітных ракетна-гарматных комплексах «Панцирь-С1».