БелАЭС. Фото: Reform.by
Да канца 2026 года Беларусь і Расія плануюць падпісанне рабочага пагаднення аб будаўніцтве трэцяга энергаблока магутнасцю 1200 МВт, паведамляе беларускае Міністэрства энергетыкі. Падрыхтоўка дакумента вядзецца сумесна з «Росатамам».
Паралельна прапрацоўваецца праект другой атамнай электрастанцыі. Найбольш перспектыўнай пляцоўкай ведамства называе Магілёўскую вобласць. Новыя магутнасці закладваюцца з разлікам на рост спажывання электраэнергіі пасля 2040 года.
“У 2025 годзе Беларуская атамная электрастанцыя выпрацавала 17 млрд кВт·г — гэта 40% усёй электраэнергіі краіны”, — заявілі ў Мінэнерга.
Нагадаем, пра прыняцце рашэння аб будаўніцтве трэцяга энергаблока на пляцоўцы БелАЭС стала вядома ў лістападзе мінулага года.
Выказваючыся пра перспектывы будаўніцтва яшчэ адной АЭС у Беларусі, Аляксандр Лукашэнка выказваў надзею пераканаць расіян пабудаваць яе, каб ён мог зарабляць на продажы электраэнергіі паўднёваму захаду РФ.
У сакавіку мінулага года, выступаючы ў Савеце Федэрацыі РФ, ён заявіў, што ў выпадку будаўніцтва другой АЭС зможа забяспечваць электрычнасцю Бранскую вобласць і «новыя рэгіёны Расіі». Пазней, падчас перамоў з Пуціным Лукашэнка сказаў, што станцыя на ўсходзе Беларусі можа быць пабудавана з мэтай «забеспячэння электраэнергіяй раёнаў, вызваленых Расіяй — Херсонская, Запарожская, Луганская, Данецкая».