Фото: mfa.gov.by
Міністр замежных спраў Беларусі Максім Рыжанкоў 25 мая правёў сустрэчу з паслом Амана ў Беларусі па сумяшчальніцтве Хамудам Салімам Абдулой аль-Тувайхам. Падчас перамоваў аманскі дыпламат перадаў Аляксандру Лукашэнку адказнае пасланне султана Амана Хайтама бен Тарэка Аль Саіда.
Як паведамілі ў беларускім знешнепалітычным ведамстве, бакі абмеркавалі рэалізацыю дамоўленасцей, дасягнутых паводле вынікаў першага пасяджэння беларуска-аманскага Міжурадавага сумеснага камітэта па супрацоўніцтве і інвестыцыях. Пасяджэнне прайшло 1–2 красавіка ў Маскаце.
Падчас сустрэчы суразмоўцы таксама разгледзелі графік сумесных мерапрыемстваў на бліжэйшую перспектыву. У прыватнасці, гаворка ішла пра правядзенне сёлета міжміністэрскіх кансультацый у Мінску.
Нагадаем, 22 красавіка старэйшы сын Лукашэнкі Віктар асабіста прыбыў у Аман у якасці спецыяльнага пасланніка свайго бацькі і ўручыў пісьмовае пасланне султану Хейсаму бен Тарыку аль Саіду. Ад імя султана Віктара Лукашэнку прыняў сын султана, спадчынны прынц, намеснік прэм’ер-міністра па эканамічных пытаннях Сайід Тэйязін бен Хейсам аль Саід. Што менавіта змяшчалася ў пасланні — не паведамлялася.