Міністэрства замежных спраў Беларусі выступіла з заявай у сувязі з блакіроўкай каналаў БелТА, АНТ і СТБ у YouTube і паабяцала адрэагаваць «адпаведным чынам».
МЗС назвала дзяржСМІ «асновай інфармацыйнага суверэнітэту» Беларусі і абвінаваціла YouTube у парушэнні міжнароднага заканадаўства.
«3 красавіка 2026 г. адміністрацыя YouTube адвольна выдаліла каналы найбуйнейшых беларускіх нацыянальных сродкаў масавай інфармацыі – БелТА, АНТ і СТБ. Гэтыя медыя з’яўляюцца асновай інфармацыйнага суверэнітэту краіны і валодаюць шматмільённай аўдыторыяй як унутры Беларусі, так і за яе межамі.
Сваім рашэннем YouTube фактычна заблакіраваў доступ мільёнаў грамадзян і суайчыннікаў за мяжой да легітымнага, афіцыйнага кантэнту. Гэта грубае парушэнне артыкула 19 Міжнароднага пакта аб грамадзянскіх і палітычных правах ААН і базавых прынцыпаў АБСЕ ў галіне свабоды СМІ», — гаворыцца ў заяве.
Беларусь вывучае сітуацыю і пакідае за сабой права адрэагаваць «усімі даступнымі сродкамі», заявіў афіцыйны прадстаўнік МЗС Руслан Варанкоў.
«Звяртае на сябе ўвагу крыклівая цішыня міжнародных структур. Тыя з іх, якія традыцыйна аператыўна і гучна заяўляюць пра любыя, нават самыя спрэчныя, выпадкі «абмежавання свабоды слова» ў неўгодных ім краінах, гэтым разам дэманстратыўна маўчаць. Гэта – класічны прыклад заходніх двайных стандартаў: правы чалавека маюць значэнне толькі тады, калі гаворка ідзе пра зручнае для Захаду меркаванне.
Беларускі бок дасканала вывучае ўсе абставіны здарэння. Пакідаем за сабой права адрэагаваць адпаведным чынам – усімі даступнымі сродкамі ў межах нацыянальнага заканадаўства і міжнароднага права», — заявілі ў МЗС.
Нагадаем, 3 красавіка каналы беларускіх дзяржСМІ БелТА, АНТ і СТБ былі выдалены з платформы YouTube. Белтэлерадыёкампанія папярэдзіла, што YouTube можа быць прызнаны экстрэмісцкім і цалкам заблакаваны ў Беларусі.Міністэрства інфармацыі Беларусі заявіла, што пакідае за сабой права прыняць адказныя меры.
