На думку намесніка кіраўніцы Аб’яднанага Пераходнага Кабінета Беларусі, кіраўніка НАУ Паўла Латушкі, «любыя дамоўленасці з ім з боку заходніх лідараў у абыход беларускага грамадства і дэмакратычных сіл не будуць трывалымі і вартымі даверу». Так ён пракаментаваў тэлефонную размову прэзідэнта Францыі Эманюэля Макрона з Аляксандрам Лукашэнкам.
«Чалавек, які намаляваў на мапе Беларусі мішэнь праз удзел у чарговым расійскім ядзерным шантажы ў адрас суседзяў Беларусі, павінен дакладна ўсведамляць наступствы сваіх дзеянняў. Павінен разумець, што менавіта ён будзе несці поўную адказнасць за любыя агрэсіўныя дзеянні і ваенныя правакацыі з тэрыторыі Беларусі.
Размаўляць з Лукашэнкам можна толькі мовай сілы і папярэджанняў з пазіцыі сілы. Францыя такой сілай, безумоўна, валодае.
Разам з тым неабходна разумець, што гэта чалавек, няздольны гарантаваць якія-небудзь абяцанні, бо яго суб’ектнасць на сённяшні дзень знаходзіцца на мінімальным узроўні за ўсе 30+ гадоў яго кіравання. Любыя дамоўленасці з ім з боку заходніх лідараў у абыход беларускага грамадства і дэмакратычных сіл не будуць трывалымі і вартымі даверу.
Перадумовай любых дамоўленасцяў і гарантый іх выканання з боку Беларусі можа быць толькі папярэдняе вырашэнне ўнутрыбеларускага крызісу праз паўнавартасны дыялог цяперашніх функцыянальных уладаў з беларускімі дэмакратычнымі сіламі і грамадзянскай супольнасцю.
Толькі Беларусь, якая прайшла праз сваю версію Круглага стала, сістэмную трансфармацыю і пераадолела ўнутраны крызіс, можа стаць паўнавартасным бокам знешніх дамоўленасцяў і гарантам іх выканання», — заявіў палітык.
Нагадаем, сёння адбылася тэлефонная размова прэзідэнта Францыі Эмануэля Макрона з Аляксандрам Лукашэнкам. Гутарка прайшла па ініцыятыве французскага боку.
Бакі абмеркавалі «рэгіянальныя праблемы і ўзаемаадносіны Беларусі з ЕС і Францыяй у прыватнасці», паведамляе прэс-служба Лукашэнкі.
