Сергей Нарышкин. Фото Пресс-бюро СВР России
Дырэктар Службы знешняй разведкі Расіі Сяргей Нарышкін пракаментаваў нядаўнюю сустрэчу з дырэктарам ЦРУ Джонам Рэткліфам. Ён не стаў удавацца ў падрабязнасці яе зместу, пастараўшыся надаць прылёту кіраўніка амерыканскай разведкі ў Маскву “руцінны” характар.
“Сустрэча адбылася, у гэтым няма нічога незвычайнага. У практыцы дзейнасці спецыяльных службаў сустрэчы кіраўнікоў, асабістыя сустрэчы або ў фармаце анлайн, – частка нашай працы. Павінен вам сказаць, што я практычна кожны тыдзень сустракаюся з кіраўніком той ці іншай спецыяльнай службы, разведвальнай арганізацыі з усіх кантынентаў свету. Так што і сустрэча з Джонам Рэткліфам, якая адбылася, – гэта працоўны фармат”, – сказаў Нарышкін, перадае ТАСС.
Нарышкін не стаў раскрываць змест перамоў.
“Падчас сустрэчы мы абмеркавалі шэраг пытанняў, якія знаходзяцца ў кампетэнцыі разведвальных службаў. А кампетэнцыя разведвальных службаў – гэта такая даволі далікатная і асаблівая рэч”, – дадаў ён.
Сёння амерыканскія і еўрапейскія СМІ са спасылкай на крыніцы паведамілі, што мэтай візіту Рэткліфа было перасцерагчы Маскву ад абмежаванага нападу на краіны НАТА, у прыватнасці дзяржавы Балтыі. Акрамя таго, уздымалася пытанне падтрымкі Расіяй Ірана.
Прэзідэнт ЗША Дональд Трамп таксама заяўляў пра “руцінны” характар паездкі кіраўніка ЦРУ.