Арганізацыя «Дапамога» Наталлі Калегавай выступіла з ініцыятывай арганізацыі рэабілітацыі для беларусак, якія прайшлі праз палітычнае зняволенне. Плануецца адправіць 20 чалавек на месяц на Канарскія астравы.
Як расказалі Reform.news прадстаўнікі арганізацыі, праект рэалізуецца перадусім за кошт асабістых сродкаў сям’і Наталлі Калегавай і дапамогі валанцёраў. Агульны бюджэт, неабходны для ўвасаблення гэтай ініцыятывы, складае каля 22 000€. На цяперашні момант, акрамя сямейных укладанняў арганізатараў, праз ахвяраванні неабыякавых людзей удалося сабраць 1300€.
“Арганізацыя падобнага выезду — складаны лагістычны і фінансавы працэс. Арэнда вілы, набыццё авіябілетаў, трансферы і харчаванне звязаныя з сур’ёзнымі выдаткамі, таму ініцыятыва шукае падтрымкі сярод беларусаў для пакрыцця выдаткаў на рэтрыт для экс-палітвязняў беларусак. Для кожнай з іх выезд да акіяна — не проста адпачынак, а жыццёва важная магчымасць зноў навучыцца дыхаць без аглядкі на турэмныя сцены”, — патлумачылі ў арганізацыі «Дапамога».
Там таксама нагадалі, што «Дапамога» працягвае развіваць яшчэ адзін важны праект — Беларускі цэнтр дапамогі для рэпрэсаваных беларусаў і былых палітвязняў «Замак» у Вільні.
Будынак знаходзіцца ва ўласнасці сям’і Калегавых, якія бязвыплатна перадалі яго ў карыстанне «Дапамозе», аднак само ўтрыманне дома — аплата камунальных паслуг і ацяплення, падтрыманне яго ў належным стане і закупка прадуктаў — цалкам залежаць ад данатаў.
Падтрымаць праект можна тут.
