Святлана Ціханоўская пачала праграму візіту ў Кіеў з ускладання кветак на магілу загінулай на вайне з РФ беларускі Марыі Зайцавай. Яна была пасмяротна ўзнагароджаная ўкраінскім ордэнам трэцяй ступені «За мужнасць».
Паводле слоў Ціханоўскай, Зайцава з’яўляецца сімвалам беларуска-ўкраінскай салідарнасці.
«Першае, што я зрабіла, калі прыехала ў Кіеў — адразу з цягніка наведала магілу Марыі Зайцавай. Яна сімвалізуе не толькі наш супраціў дыктатуры, але і ўкраінска-беларускую салідарнасць. Для мяне было вельмі важна пачаць гэты візіт менавіта з ушанавання чалавека, які аддаў жыццё за свабоду Украіны і Беларусі.
Марыі было ўсяго 24 гады. Яна была вельмі светлым, смелым і прынцыповым чалавекам. Як і тысячы беларусаў, у 2020 годзе яна выйшла супраць гвалту і несправядлівасці ў Беларусі. А калі Расія пачала поўнамаштабную вайну супраць Украіны, яна не засталася ўбаку. Яна далучылася да беларускіх добраахвотнікаў і стала часткай агульнай барацьбы супраць расійскага імперыялізму і дыктатуры.
Для мяне Марыя — гэта сімвал новага пакалення беларусаў. Людзей, якія разумеюць, што свабода Беларусі і свабода Украіны непадзельныя. Яна загінула як герой, але яе імя будзе жыць. І наш абавязак — зрабіць усё, каб ахвяра Марыі і іншых герояў не была марнай», – заявіла Святлана Ціханоўская.
Разам з Ціханоўскай у цырымоніі ўзялі ўдзел намеснік кіраўніцы АПК Павел Латушка і кіраўнік апарата АПК Валер Мацкевіч.
