Николай Статкевич
Святлана Ціханоўская пракаментавала інфармацыю пра вызваленне палітвязня Мікалая Статкевіча, якую сёння паведаміла яго жонка, Марына Адамовіч.
«Я адчуваю вялікую палёгку ад таго, што Мікалай Статкевіч нарэшце на волі і дома. Асабліва рада за Марыну, якая так доўга чакала і так настойліва змагалася за Мікалая ўсе гэтыя гады. Я шчыра жадаю яму сіл, здароўя і як мага хутчэй аднавіцца пасля перанесенага інсульту. Цяпер важна, каб Мікалай атрымаў неабходнае лячэнне, цяпло сям’і і падтрымку блізкіх”, — заявіла палітык.
Яна дадала, што за кратамі застаюцца яшчэ не менш за 1100 палітычных зняволеных.
“Усе павінны быць вызвалены», — падкрэсліла лідар дэмсіл.
Вызваленне Мікалая Статкевіча пракаментаваў кіраўнік праваабарончага цэнтра «Вясна», лаўрэат Нобелеўскай прэміі міру і былы палітвязень Алесь Бяляцкі.
«Цудоўная, доўгачаканая навіна. Мікалай Статкевіч, патрыярх беларускага супраціву, які столькі гадоў знаходзіўся ў турме, нарэшце выйшаў на волю. Ён дамогся свайго, застаўся ў Беларусі. Радасць з горкім прысмакам. Свабода дасталася яму дарагой цаной, у Мікалая сур’ёзныя праблемы са здароўем. У турме ўлады адбіраюць у палітвязняў здароўе, а часам і жыццё. Садысцкі рэжым не ведае літасці. Дарагі Мікалай, папраўляйся! Наша справа яшчэ не скончана, ты патрэбны Беларусі!» — прыводзіць яго словы “Вясна”.