Фото: Reform.by
Золатавалютныя рэзервы Беларусі па выніках чэрвеня скараціліся адразу на 881,8 млн долараў. Гэта самае вялікае падзенне ЗВР за апошнія месяцы.
Як паведамілі ў Нацбанку, на 1 ліпеня золатавалютныя рэзервы склалі 14,156 млрд долараў.
Скарачэнне рэзерваў у Нацыянальным банку патлумачылі зніжэннем кошту золата.
У чэрвені кошт золата, уключанага ў ЗВР, зменшыўся на 896,8 млн долараў — да 6,98 млрд долараў. Кошт спецыяльных правоў запазычання таксама скараціўся на 9,4 млн долараў — да амаль 1,4 млрд долараў. Рэзервовыя актывы ў замежнай валюце выраслі на 24,5 млн долараў — да 5,77 млрд долараў. Рэзервовая пазіцыя ў МВФ у памеры 0,03 млн долараў і іншыя актывы ў памеры 0,1 млн долараў засталіся без змяненняў.
З пачатку года ЗВР скараціліся на 267,2 млн долараў, у тым ліку кошт золата зменшыўся на 485,9 млн долараў, спецыяльных правоў запазычання — на 14,2 млн долараў, а рэзервовыя актывы ў замежнай валюце павялічыліся на 232,8 млн долараў.