Фото: пресс-служба Лукашенко
Кадравыя пытанні, а таксама вынікі праверкі Узброеных сіл сталі тэмамі даклада міністра абароны Віктара Хрэніна Аляксандру Лукашэнку. Ён прыняў кіраўніка ваеннага ведамства пасля кадравых прызначэнняў.
«Калі на канкрэтным участку (мы гэта ведаем з досведу) нармальны чалавек, значыць, там і сітуацыя будзе нармальная. Калі не той чалавек — бяда. Мы з вамі дамаўляліся, што вы сур’ёзна падумаеце, з кім вы будзеце далей служыць. Гэта прычына нашай сустрэчы і размовы», — сказаў Лукашэнка Хрэніну на пачатку гутаркі.
Таксама ён прапанаваў абмеркаваць вынікі праверкі Узброеных сіл. Пра іх ужо ішла гаворка на мерапрыемстве, праведзеным самім міністэрствам.
«Я чакаў, калі вы самі там разберацеся ў добрых рэчах і недахопах (іх заўсёды хапае). Але мы асабліва і не хавалі тыя недахопы, якія бываюць у арміі. Я вырашыў, што нам хаваць гэтыя недахопы не трэба, але і напаказ мы іх асабліва не выстаўлялі. Не бывае так, што пра Узброеныя сілы дзесьці дрэнна гавораць. Але мы гэта больш адкрыта рабілі, чым кіраўніцтва іншых краін. Напэўна, гэта і правільна: людзі павінны бачыць, што мы нічога хаваць не будзем», — сказаў Лукашэнка.
Ён таксама разлічвае, што праца над ліквідацыяй і выпраўленнем выяўленых падчас праверкі недахопаў не завершыцца.
«Я вельмі разлічваю, што гэты працэс не скончыцца, што кіраўніцтва арміі і перш за ўсё міністр будуць надаваць самую сур’ёзную ўвагу тым недахопам, якія выявіліся пасля гэтай праверкі», — дадаў ён.
Паводле яго слоў, у Беларусі працягнецца кропкавая мабілізацыя вайсковых часцей для іх падрыхтоўкі.
«Далей, як я абяцаў, мы кропкава будзем адмабілізоўваць часці для таго, каб рыхтаваць іх да вайны. Дай бог, каб яе ўдалося пазбегнуць», — сказаў Лукашэнка.