У Віцебскай вобласці 23-гадовага мужчыну прысудзілі да 14 гадоў пазбаўлення волі за замах на забойства двух чалавек, незаконнае пазбаўленне волі і пагрозу прымянення гвалту ў дачыненні да супрацоўніка міліцыі.
Гаворка ідзе пра злачынства, якое адбылося 20 жніўня 2025 года. Згодна з матэрыяламі справы, мужчына пранік праз акно першага паверха ў кватэру сваёй былой дзяўчыны. Там ён некалькі гадзін утрымліваў гаспадыню кватэры і яе 17-гадовую дачку, пагражаў ім нажом і ўжываў фізічны гвалт. Ён цягаў пацярпелых за валасы і наносіў удары і спрабаваў прымусіць непаўналетнюю ўжыць псіхатроп. Частку рэчыва ён ужыў сам.
Затым мужчына выпхнуў 17-гадовую дзяўчыну з акна. Яна паспрабавала ўцячы, аднак нападнік дагнаў яе на вуліцы і на вачах у відавочцаў не менш за два разы ўдарыў нажом у вобласць жывата.
Раней паведамлялася, што раніцай 20 жніўня 2025 года ў міліцыю патэлефанавала жанчына і паведаміла, што яе 17-гадовую дачку забівае знаёмы. Супрацоўнікі Першамайскага РАУС Віцебска, якія прыбылі на месца, убачылі ў двары мужчыну, які наносіў дзяўчыне ўдары нажом. Спрабуючы схавацца, ён дабег да будынка ўстановы адукацыі, дзе разбіў шыбы, а ў момант затрымання замахваўся нажом на супрацоўнікаў міліцыі. Адзін з супрацоўнікаў стрэліў па нагах мужчыны.
Пацярпелую шпіталізавалі ў рэанімацыйнае аддзяленне. Затрыманы таксама быў перададзены медыкам. На момант затрымання яму было 22 гады, раней ён быў судзімы за злачынствы, звязаныя з незаконным абаротам наркотыкаў.
Суд прызнаў мужчыну вінаватым і прызначыў яму 14 гадоў калоніі ўзмоцненага рэжыму без штрафу. Прысуд Віцебскага абласнога суда пакінуты без змяненняў Вярхоўным судом і ўступіў у законную сілу, паведамілі ў Генеральнай пракуратуры.