Одна из собак в пункте временного содержания животных "Фауна города". Фото: Facebook-страница "Гурского - НЕ ПРИЮТ"
Валанцёры паведамляюць пра крытычную сітуацыю ў мінскім пункце часовага ўтрымання жывёл «Фаўна горада» на вуліцы Гурскага. Паводле іх слоў, ён перапоўнены, усе вальеры і пакоі занятыя, сабакі стаяць па дзве-тры. Толькі за два дні паступіла 19 жывёл. Каб у панядзелак былі месцы для новага адлову, неабходна забраць мінімум 30 сабак.
Зааактывісты звязваюць перапоўненасць з увядзеннем з 1 ліпеня 2026 года абавязковага падатку на сабак. Гаспадары, якія не жадаюць рэгістраваць гадаванцаў і плаціць падатак, масава здаюць хатніх жывёл.
«Сябры, на Гурскага ў Мінску ў “Фаўне горада” бяда. Пасля прыняцця новага закона, каб не рэгістраваць жывёл, іх цягнуць адусюль масава і здаюць, здаюць, здаюць ва ўсыпалку… хатніх, безабаронных. Адлоў хапае без разбору ўсіх сабак на самавыгуле», — пішуць яны.
Валанцёры просяць мінчан забраць сабаку дадому або на ператрымку.
«Калі ласка, не трэба пісаць кепскія каментары і прапаноўваць закрыць адлоў, перастаць прымаць жывёл і іншыя фантазіі, якія ніколі не будуць ажыццёўлены. Адзіная адпаведная дапамога цяпер — гэта забраць сабаку», — заклікаюць яны.
Наведванні адкрытыя штодня з 14:00 да 18:30 па адрасе вуліца Гурскага, 42. Пры сабе неабходна мець пашпарт.
З 1 ліпеня 2026 года хатнія каты і сабакі ў Беларусі падлягаюць абавязковай рэгістрацыі. Падатак за валоданне сабакам складзе 14 рублёў за квартал, за сабаку патэнцыйна небяспечнай пароды — 67 рублёў. Ён будзе ўключацца ў жыроўку. Рэгістраваць гадаванца неабходна на працягу трох дзён з моманту набыцця.
Ад выплаты вызвалены людзі, якія маюць інваліднасць I і II групы, уладальнікі сабак-павадыроў, шматдзетныя сем’і і шэраг іншых катэгорый. Зарэгістраваць сабаку можна бясплатна ў службе «адно акно». За адсутнасць рэгістрацыі пагражае штраф ад 45 да 675 рублёў, за нявыплату падатку — 15% ад сумы доўгу.
Улады плануюць выяўляць незарэгістраваных жывёл у тым ліку праз даныя ветэрынарных клінік і суседзяў.